Charter Document - 02220530

In nomine sancte et individue Trinitatis Nous Jehans cuens de Bourgoigne et sires de Salins faisons savoir à touz [] que come nous aions eu et receu et tenu pour le mariaige que nous preismes en Mahaut nostre premiere fame mere à noble baron Hugue conte de Bourgoigne palatin nostre fil sexante muys de vin de rente chascun anz à Biaune ou celier à noble baron Hugue duc de Bourgoigne lesquiex nous vendimes por noz necessaires besoignes delivrer et aiens eu et receu doudit mariaige doux mile mars d'argent en bons deniers nombrez plainement et entierement lesquex nous avons despendu et en profitables afaires et torné sunt en nostre preu et aiens pris eu et tenu doudit mariaige nostredite fame la vile et la poesté de Barges et L'Abergement devant Suerre et quanque nous avions et tenions et solions tenir en la cité de Chalon et es appendises pour ledit mariaige lesquies devantdites viles et lesquies devantdites choses nous donames et baillames adit duc par l'eschange que nous feimes à luy de la signorie de Salins laquel nous eumes doudit duc et laquel nous tenons or en droit nous en recompensacion et en eschange dou devantdit mariaige et des fruiz des yssues et des chautés que eu et trait en avons puis la mort de ladite Mahaut jadis notre fame et en recompensacion et en emende de griez et de domaiges que fait avions adit Hugue nostre fil de quoi nous avions mavaise conscience et pour nous delivrer de ceste debte et ostez de pechié avons doné et outroié et quitté après nostre decès adit Hugue nostre fil et fil et hoir à ladite Mahaut le chestel de Bracon et le borc si come il se porte dois Feruse envers Bracon et nostre pré de Lothon et le parc dessus Bracon si come il est jusques à la porte de Bracon avec ce que y siet et Hugon fiz jadis Damwyon de Salins qui est chestelain de Bracon et ses hoirs et mil livrées de rente permaignablement chescun an en nostre puis de Salins et la tierce partie de toutes noz vignes assises ou val de Salins et pour ces choses lidiz Hugues nostre fil nous a quitté par son soirement sur saint evangile doné nous et noz hoirs toutes les choses que il nous pooit demander pour raison doudit mariaige sa mere et des yssues et des grieves et des domaiges que fait li avions Après ce con nous eussons en memoire nostre derreinneté et nostre fin et pansessiens en la salut de nostre arme nous en nostre bon senz et en nostre bone memoire et de nostre bone volunté et pour ce que contens ne naisse ne ne soit après nos entre noz enfant avons devisé et departiz par consoil de proudomes noz autres possessions noz biens et noz henours à noz enfant à avoir et à tenir après nostre decès en tel meniere que nous volons et outroions que lidiz Hugues nostre ainnez fiz cuens de Bourgoigne palatins ait et tiegne pour sa partie toute la terre les biens et les possessions que nous avons et devons avoir de part le conte Estevenon qui fut nostre pere et touz les edifiz et toutes les conquestes que nous y avons fait et que nos y farons sauz Rochefort Saint Juliain Orgelet et Valnantois et toutes les appendises desdiz chestiaux et desdiz leus lesquiex chestiaux et lesquiex appendises nous volons et outroions que nostre enfant que nous avons de la contesse Ysabel nostre seconde fame ce est à savoir messire Jehans Estevenet et Perrenins aient et tiegnent pour lour partie Et volons encor que lidiz Hugues ait et preigne après nostre decès pour sa partie doux mile livrées de rente en nostre puis de Salins desquies doux mile livrées nous avons retenu par son gré six cenz livrées de rente pour faire nostre volunté ansi con il est contenuz es lettres que de luy en avons Et volons et outroions que lidiz Hugues nostre fiz ait et preigne doux cenz livrées de rente en la partie que nostrediz enfant c'est à savoir messire Jehans Estevenet et Perrenins auront de nous ou puis de Salins et laquel nous lour deviserons cy après Après nous donons et outroions es enfanz que nous avons de ladite Ysabel c'est à savoir mons Jehan Estevenet et Perrenin Rochefort Saint Juliain Orgelet et Valnantois por lour partie ansi con dessus devisé lour avons et lour donons uncor et outroions en lour partie Valampoliere Montenot Chestelbelin et la fort maison devant qui a nom Grimbert et la tour de la Fontaine Benoite et totes ces devantdites choses avons nous outroié esdiz enfant de ladite Ysabel en lour partie ensamble Chevanes et les appendises et cinc mile livres d'estevenens en deniers que nous avons doné et baillié piece a à dame Blanche dame de Biaujuel serour adit Jehan Estevenet et Perrenin laquel nos eumes de la contesse Ysabel devantdite Après es enfant que nous avons et aurons de la contesse Lore nostre tierce fame fille jadis mons Symon de Commercy donons et outroions et assignons pour lour partie le chestel de Chalemont et les appendises de la vile de Boujaille et [ce] qui y apent et quanque nous avons et devons avoir dois Chalemont envers Pontallié et envers le val de Meges la Chau d'Allié le chestel de Noseroy et tout le val de Meges et ce que y apent Gardebois et Morenant Et avez ce lour donons et devisons en lour partie le chestel de Monmaour et les abergement de Faloise et la combe dou Fraigne et quanque nous avions estaubliz et estaublirons appartenir esdiz leus et quanque nous y avons aquis et aquerrons en fiez et domeneures esdiz leus et enqui entour par achat ou par don ou par gagiere ou en autre maniere et lour avons doné à Salins une fort maison qui a nom Chestelguion et la maison que nous avons fait à Salins en nostre bourc de Salins ou chasal qui fut Estevenin le Fevre et lour avons encor doné en lour partie Hugonin Mogerot et Girart Chambier de Salins et lour hoirs et le chemin dois Biaumont sus Loeu tanque à L'Espine de Boule lequel il doivent tenir doudit Hugon nostre fil et de ses hoirs Et est à savoir que nous volons et comandons que li enfant que nous avons de ladite Ysabel d'une part et li enfant que nous avons et aurons de ladite Lore d'autre part partent par my après nostre decès toutes noz autres rentes que avons dedenz les murs de Salins que cy dessus ne sunt devisées ne escriptes et les fiez et les chassez en nostre poiz de Salins sauz le fié le conte de Mombeliart que doné avons adit Hugue nostre ainné fiz en sa partie et que y partent la signorie de la vile et le remanant de la vile de Salins et le remanant des maieries et des prevostés dedenz les murs de Salins et defuer des murs Et sunt adès sauves adit Hugue nostre ainnez fil lesdites doux mile livrées de rente que doné li avons en sa partie desquex doux mile nous avons retenuz six cenz livrées de rente assi con dessus est devis et sunt encor sauves adit Hugue les mil livrées de rente que nous li avons doné et outroié en recompensacion dou mariaige sa mere assi con dessus est devis Et volons encor que li enfanz que nous avons de ladite Ysabel et cil que nous avons et aurrons de ladite Lore partent per my les vignes que nous avons ou val de Salins et les prez sauz le tierz desdites vignes et le pré de Loton que nous avons doné adit Hugue en recompensacion dou mariaige sa mere ensi con dessus est devis Et volons que adès soient sauves les choses et li home que nous avons doné et outroié especialment es enfant que nous avons et aurons de ladite Lore et les homes que nous avons ou bort le conte de Bourgoigne volons que il partent par my li enfanz que nous avons de la contesse Ysabel et cil que nous avons et aurons de ladite Lore Et adès volons et comandons que en la partie es enfanz de ladite Ysabel dou puiz de Salins ait et preigne lediz Hugues nostre fil doux cenz livrées de rente assi con dessus devisez l'avons Et est à savoir que nous volons que à Montenot apende quanque nous avons en fiez en demeneures et en garde tanque lay où li terretoire de Cernens devers Salins faut si que Cernens en est et quanque nous avons en demeneures en fiez et en garde dois la Froide Fontaine qui est entre l'ospital de Chalemont et Viller sauz ledit habergement et ladite combe que doné avons es enfanz que nous avons et aurrons de ladite Lore Cil qui tanra Bracon ne puet crestre le chesteal ne le bourt de Bracon fuers que par enqui où fermé sunt Cil qui tanra Chestelbelin se puet crestre de fermeté par devers Clucy tant con luy plera et par devers Salins noient Cil qui tanra la tour de la Fontaine Benoite se puet crestre de fermeté par domaige rendant tanque à quarante piez de la voie qui va vers Saint Anathoile par dessus la vigne Willermet Senebron et tanque à quarante piez dou vergier à tresorier de Besençon Cil qui tanra Chestelguyon se puet crestre de fermeté tanque à cemetiere de Saint Anathoile et tanque à curtil mons Perrin de Ceys et tanque à curtil mons Colin Petit Cousin par domaiges rendant Et après est à savoir que nous retenons en nostre pooir les fiez de la signorie de Salins et ces de la signorie que nous remest dou conte Estevenon nostre pere que devisé doné departi ne ordené n'avons pour ordener doner departir et deviser bien et loialment entre nostre ainné fil ledit Hugue et noz autres enfant que nous avons et aurons de noz autres doues fames c'est à savoir de la contesse Ysabel et de la contesse Lore devantdites Après volons et comandons que tuit nostre hoirs chescun selon ce qu'il tanra de nostre heritaige en nom de partie soit tenuz de paier noz debtes et d'amender noz clains et volons que nostre hoir soient tenuz de outroier et de garantir les fiez et les dons et les aumones que fait et doné avons à ces cui fait les avons chescun ces qui en sa partie avendront et en cui partie saront lidiz fiez et lidiz dons et lesdites aumones Et est à savoir que nous volons et comandons que se aucun de nozdiz enfant venoit contre ceste nostre devise que fait avons entre noz enfant que Dex ne vuille que nostre ainnez fiz lidiz Hugues cuens de Bourgoigne preigne et tiegne la partie celuy de Salins qui encontre cest nostre devis vandra et la tiegne tan[que] il en face joir cex ou celuy qui à nostre devis s'acordera et tanque li domaiges que il en sustenra li soient restoré et soit aidanz et consoillant à cex ou à celuy qui consentiront et s'acorderont à nostre devis et à nostre velonté et ce nous a promis de faire par son soirement lidiz Hugues et Aelix contesse palatine de Bourgoigne sa fame les nous a assiment promis par son soirement Après nous volons que cil nostre devis vaille ou come testament ou come codicille ou se ne pooit ensi valoir se vaille come devisions entre noz enfanz ou come quelque plait entre derreine volunté Et volons et requerons que nostre redoté sires Vuillames par la grace de Deu arcevesques de Besençon et quiqonques sera après luy arcevesques soit executours de cest devis con fait et ordené avons de nozdiz enfant ensi come il est contenuz en ces presentes lettres et prions et requerons que il esconmunioit ces ou celui de noz enfant qui contre nostre devantdiz devis yront ou vanront Et pour ce que ces choses toutes devant escriptes soient fermes et estaubles et que nuls ne puisse encontre venir nous avons fait seler ces presentes lettres dou seel honorable pere en Jesu Crist Vuillame par la grace de Deu arcevesque de Besençon nostre chier signour et dou nostre seel avec en tesmoing de verté Ce fut fait en l'an de l'incarnacion Nostre Signour MCC et sexante et doux le jour de Pasques flories