Charter Document - 02220529
| Charter Number: | 02220529 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Religious |
| Charter Type(s): | Quittance |
| Date: | 1314 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.272) |
Charter:
Nous freres Pierres maistres de la maison de Saint Esprit de Besençon et tuit li freres de cel meisme leu faisons savoir à touz que come nobles bers et puissanz messires Jehans de Chalon signour d'Allay et de Neele nous ait doné baillié ou assi et delivré pour luy et pour ses hoirs à touzjours mais dix livrées de monée corsable à temps des paiement à panre et à recevoir de nous et de noz successours chescun an le jour de sainte Croiz de may sus ses rentes de la salnerie de Salins ou pois qui est ou bourt communal des seignours en recompensacion d'une nostre maison dou chasal et dou mex d'ycele assise en la cité de Besençon devant la place dou poiz dou merchié entre la maison qui fut Laborier d'une part et le chasal qui fut à Sicuene d'autre pour laquelle maison ensamble le chasal et le mès à celle lidiz nobles avoit aproprié et joint à mex de sa maierie de Besençon et à mex qui fut Lauborier pour ce que necessaires li estoit et en recompensacion des arraiges desdiz maisons et mex de que nous ne avienz riens eu doudit noble ne de son comandement de treze ans passez et plus et pour ce que nous sumes tenuz de faire touzjours mais chescun anz le jour de la devantdite feste de la sainte Croiz de may un anniversaire pour le remede des armes des ancessours de celuy noble et de noble et puissant dame Marguerite de Bourgoigne premiere fame doudit noble avons doné donons baillons ou asi et outroions adit noble et à ses hoirs à touzjours mais pour nous et pour noz successours pensé en ceys et regardé diliganment le commun profit de nostredite maison de nous et de noz successours la devantdite maison ensamble le chasal et le mex d'ycelle et ledit noble et les siens quittons des devantdiz arraiges pour la cause dessusdite Et sumes encore tenuz de faire touzjours mais chescun an le jour de la devantdite feste sainte Crois en nostre yglise un anniversaire pour les ancessours doudit noble d'iceluy et de sa devantdite fame En tesmoint de laquel chose nous avons mis nostre seal commun pendant en ces presentes lettres faites et donées le londi devant la feste de la nativité Nostre Dame l'an de grace corrant par mil CCC et quatorze ou mois de septembre