Charter Document - 02220528

Nous Vuillames humiles abbes de Goile et touz li covent de cel meisme leu faisons savoir à touz que nous en eschange et en recompensacion dou fié de la vile de Tesy et des appendises de celle vile et de toutes les choses que li nobles bers Jehans de Chalon sires d'Allay avoit en la ville de Tisy et es appendises de celle vile lesquies choses toutes donées ha à nous et à nostre yglise sauz la justice grant et petite et la garde et les corvées toutes et de forche et de rastel et l'ost et la chevachié et les gelines de karoinmentrant que il ha retenu à luy et à ses hoirs donons outroions baillons et quittons adit Jehan et à ses hoirs Martenet de Boujaille et son mès Perrenet Faisant et ses freres et lour partaiges ensamble lour mès les enfant Pertuiset ensamble lour mès Patin Haymonet son frere et lour nevour ensamble lour mès et oit jornaux de terre arable et dix soiptures de prey que nous avons en demenure et douze deniers de cens que nous avons sus la maison es Messiers et dix deniers de cens que nous avons sur la maison Grillon et toutes les choses quel qu'eles soient que nous avons et devons avoir en ladite vile de Boujaille et ou terretoire saulz tel partie con nous avons et devons avoir es diemes de Boujaille et ou territoire laquel partie nous exceptons et retenons pour nous et pour nostre yglise de Goile Et les devantdites choses donées prometons à devantdit mons Jehan garantir à droit luy et à ses hoirs en bone foy contre toutes genz En tesmoint de ceste chose nous avons mis noz seaus pendant en ces presentes lettres faites et donées l'uictive de la Magdeleine l'an Nostre Signour corrant par mil CC octante et cinc