Charter Document - 02220526
| Charter Number: | 02220526 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Quittance |
| Date: | 1259 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.268) |
Charter:
Nous Hugues cuens de Vianne et sires de Paigney faisons savoir à touz que nous avons vendu à noble baron Jehan conte de Bourgoigne et signour de Salins nostre signour cenz livrées de terre lesquies il nous devoit asseoir à l'esgart de quatre chevaliers pour les covenances qui furent entre ledit conte Jehan et le conte Guillame de Vienne nostre oncle de Pymont et de L'Estoille et dou Pin pour douze cenz livres d'estevenens pour le paiement desqueles y nous quite une chadiere ou puiz de Laon le Saunier pour siex cenz livres laquel chaudiere Estevenins li Fevres avoit en gage de nous pour huit cenz livres d'estevenens si come il disoit et les autres six cenz livres devons nos panre ou pouiz de Salins en sel per ansi con li autre marcheant l'acheteront Et devons comencier à panre ou mois de Pasques pruchainement passées et devons estre paiez doudiz sel à la mi ost pruchainement à venir et devons faire porter ledit sel à Dole ou plus loing que Dole par devers nostre terre Ce fut fait l'an de l'incarnacion Nostre Signour qui corroit par mil doux cenz cinquante et nuef le diemanche prochain après feste saint Marc evangeliste