Charter Document - 02220524

Nous Jehans de Bourgoigne faisons savoir à touz que come discors fust entre nobles homes mons Jehan de Chalon signour d'Allay d'une part et mons Hugue de Vienne signour de Paigney d'autre part sus plusours quereles nous desdiz discors et quereles avons ordené et pronuncié en ceste maniere c'est à savoir que le fié de Chestoillon que messires Jehans de Vienne tenoit de mons Phelippe de Vianne çay en arriers son frere et pere doudit Hugue et per consequent tenir le devoit doudit Hugue lidiz Hugues le doit quiter adit mons Jehan de Chalon parmi douze cenz livres de monoie corrant à cel temps en l'arceveschié de Besençon en la valour de tornois petit ou d'estevenens qui doivent estre paiez et delivrez adit Hugue doudit mons Jehan et parmi les quereles et greuses que lidiz messires Jehans de Chalon avoit à Degnens en ce que apertenoit à fié le seignour de Degnens et parmi l'eritaige que lidiz messires Jehans de Chalon doit avoir et aquerir de mons Jaique de Cherrain chevalier qui siet à Lenz à Biaumont et à Saint Didier et en ceste maniere lidiz Hugues doit garantir adit mons Jehan pour luy et pour ses freres de part pere et mere ledit fié quant à lour en apartient ou apartenir doit Et d'autre part pour ses petiz freres desquies il est avoiers et se ansi estoit que li termes d'avoerie passez lidiz freres vousissent avoir recours à fié quant à ce que à lours en apartient et il l'emportessent de raison lidiz Hugues le doit recompenser adit mons Jehan en la moitié des choses dessusdites c'est à savoir de ce qu'il enporte doudit mons Jehan sauz ce que par son soirement lidiz Hugues ne puet faire partaiges à sesdiz petit freres par quoy la moitié doudit fié que à luy apertient doige venir à lour main Et doit lidiz Hugues adit mons Jehan conostre touz les fiés de que messires Philippes de Vianne estoit en sa foy per ansi con il est contenuz es lettres que lidiz messires Jehans en ay et faire autres noveles lettres de confirmacion Et se nuls en y avoit obscurs lidiz Hugues les li doit aplener per ansi come il est contenuz es lettres sauz le fié de Monnet et le fié de Cusel per ensi come messire Wachiers de Commercey qui fut le tenoit de mons Philippe de Vianne lesquies nous retenons à nostre ordenance Item disons et ordenons que de touz les discors et greuses qui sunt entre les terres et les genz desdiz mons Jehan et mons Hugue en la terre de Blaterens d'Allay et de L'Estoille et en la terre de Monmoret de Ruffey et de Laons et es apertenances toutes d'yceles lour soit declairée per mons Michiel de Chevrel et per maistre Estene d'Orgelet liquex per lour soirement doné en nostre presence lou doivent faire bien et loialment pour l'une partie et pour l'autre et se faire ne pooient nous y devons metre autres doux à nostre volunté pour ordener desdites choses per ainsi come elles ont estez anciainement demenées à temps le conte de Chalon le conte de Vianne et le signour de Ruffey Et se point y avoit ou avenoit des descours en façant et en traictant cesdites choses nous le retenons touzjours à nous de quelque chose ce soit pour ordener à nostre volunté et se ansi estoit que riens y fut obliez nous retenons touzjours la cognissance à nous Tesmoint nostre seal pendant C'est fait et doné le mardi après la mi ost l'an mil CCC et trois