Charter Document - 02220522

Nous Thiebaut par la grace de Deu roy de Navarre de Champaigne et de Brie cuens palatins faisons savoir à touz que come paroles fussent de mariaige de noble home Hue duc de Bourgoigne et de damoisele Biatrix nostre serour à la parfin nous sumes accordé en celle maniere que nos donons à devantdit duc ladite Biatrix à fame et donons à ladite Biatrix pour tout son partaige de pere et de mere de terre ou de mueble Lile dessouz Monreal et toutes les apartenances et touz les fiez sauz le fié à signour de Noyres qui muet de Lile Et donons encore à ladite Biatrix pour son partaige si come il est devant dit vint mile livres de tornois à paier adit duc ou à son comandement es termes ciaprès numez c'est à savoir six mile livres de tornois à ceste pruchaine foire de Bart et sept mile livres de tornois à l'autre foire de Bart ensugant et les autres sept mile livres de tornois à l'autre foire de Bar ensugant après Et pour tant li devantdiz duc et ladite Biatrix ont quité à nous et à noz hoirs touz l'eritaige qui eut à venir à ladite Biatrix de part pere et de part mere et tout le mueble save la droite eschoite se elle y avenoit Et se y avenoit que ladite Biatrix morut ançois que li devantdiz duc et senz hoir doudit duc et li devantdiz dux heust receues toutes les vint mile livres de tornois il seroit tenuz à rendre à nouz ou à noz hoirs quatorze mile livres de tornois à quatre années puis la mort de ladite Biatrix chescun an le quart c'est à savoir le premier quart dou jour que elle saroit morte en un anz et seroit ceste paie faite à Troies et ensic chescun an continuelment en tel jour et en tel luez meisme jusque à tant que toutes les paies fussent faites Et les six mile livres de tornois de ces devantdites vint mile livres demuerent adit duc et pour les despens et pour les cous que elle auroit fait tout come elle auroit demoré avec ledit duc conbien que elle y eust demoré ou pou ou anques et en quel temps que elle morut il ne seroit tenuz de paier fors ce qu'il auroit receu outre les six mile livres de tornois Et ce qu'il auroit receu outre les six mile livres tornois il seroit tenuz à paier à quatre années pruchaines puis la mort de celi Biatrix es termes et ou leuz si come il est devant devisé Et se li dux moroit avant que cil paiement fussent fait sui hoirs seroient tenuz de asseoir selon la forme devantdite Et se avenoit que li dux morut ançois que ladite Biatrix et elle n'eust hoir de luy vivant li hoir doudit duc seroient tenuz de rendre à ladite Biatrix ou es suens toutes les vint mile livres de tornois se li dux les avoit receues et se il ne les avoit toutes receues ce que il en auroit receu Et saroient cil paiement fait es quatre années après la mort le duc chescun anz le quart es termes et en leu selon la forme devantdite Et ladite Biatrix nous a fait homaige lige de son heritaige de Lile et des appartenances si con elles sunt dessus nummées et li hoirs de la dite Biatrix qui tanront la terre de Lile dessus nommée saront tenuz de faire homaige à nous ou à noz hoirs et elle meisme est tenue de faire homaige de ladite terre de Lile à noz hoir et s'ele vivoit plus de nous et li dux devantdiz n'est pas tenuz de faire homaige à nos ne à noz hoirs de la terre de Lile Et li dux devant nommez a doné à ladite Biatrix quatre mile livrées de terre à dijenois qui li doivent estre assises à Chestoillon sur Sene et en la chestellenie et en Wilaines en Duyeimois et es appertenances et à Victel et es appartenances Et se les choses devantdites ne valoient les quatre mile livrées de terre per le pris de doux chevaliers qui mis y seront li uns de part le duc et li autres de part nous elles saroient parfaites à l'esgart des doux chevaliers qui mis y saroient si come devant est dit lesquies les perfaroient en bone foy pour l'une partie et pour l'autre à plus près des lieus devantdit et en ces devantdiz leus de doaire ne puet li dux riens retenir s'il ne valoient plus de quatre mile livres de terre per l'esgart des doux chevaliers qui mis y seroient et se plus valoient li plus ne saroit pas dou douaire Et est à savoir que nous et nostre hoirs devons garantir contre touz homes jusques à droit Lile et ses apartenances si come devant est dit à devantdit duc et à ladite Bietris et es hoirs de ladite Bietris en telle maniere que se ces choses ou acune d'yceles que nous devons garantir ne poissons garantir ne nostre hoir ne serions tenuz de faire soffisant eschange par l'esgart des doux chevaliers desquies devant est parlez et se cil estoient mors ou li uns d'yaux par autres qui seroient mis en leu des mors ou dou mors selonc la forme devantdite En tesmoing desquies choses nous avons fait ces lettres seeler de nostre seal lesquex furent faites l'an Nostre Signour mil CCLVIII ou mois de novembre