Charter Document - 02220521

Je Colins chenoines de Saint Anathoile de Salins et curé de Cernans fais savoir à touz que je de ma bone volunté et non mie contrainz ne deceu ay doné et doing à noble baron mons Jehan de Chalon signour d'Allay mon très chier et amé seigneur pour assez de biens que il m'a fait et pour assez de miezvaillances que me sunt venues de luy en façant son servise touz mes biens muebles en deniers en vin en blef en debtes et en toutes autres choses en quelque chose que ce soit senz mes robes de mon cors et de mon lit et sauz quatre vingz livres que je doy Haymonin Augustin lesquies je doy premier paier Et lidiz Jehans mes sires doit paier et tenuz en est les quatre vint livres Aubertin de Gibbe mercheant de Milam et quanque je doy à Salins pour luy Et promet adit mons Jehan par mon soirement corporelment doné sus sainz evangiles que je luy ou à son comandement feray savoir manifesteray et delivreray touz mes biens muebles que je ay et puis avoir en quelque leu que il soient tanque à jour de la confeccion de ces lettres et que je ne celeray riens ne mentiray à mon pooir par mon soirement doné outre la valour de vint souz En tesmoignaige de laquel chose j'ay mis mon seal pendant en ces lettres et y ai fait metre le seal dou noble baron Henry signour de Jou et les seaux mons Guillaume de Baume curé d'Allay et mons Jehan de Lohorainne curé de Blaterens Faites et données l'uictive de la saint Vincent l'an Nostre Signour corrant per mil doux cenz octante et cinc