Charter Document - 02220518

Sachent tuit cil qui verront ces presentes lettres et cest presenz instrument que l'an Nostre Signour corrant par mil CCC et nuef en l'indicion septime le noveime jour dou mois de juillet en la presence de nous Hugue et Oudet clers tabellions subscriz pour ce especialment venant et estaubliz ou bourc de Joigne en la chapelle de cel bourc en la dyocese de Losanne nobles baron saiges et puissans messires Jehans de Chalon sires d'Allay d'une part et messires Loys de Savoie sires de Waut d'autre part ont cogneu et confessé lour avoir fait les covenances cy après escriptes et devisées c'est à savoir que lidiz Jehans de Chalons sires d'Allay a promis et promet per son soirement qu'il curera et procurera que Ysabel sa fille se ajostera par mariaige et pour espouse à devantdit Loys et lidiz Loys a promis et juré par son soirement que il prendra à fame et à espouse la devantdite Ysabel selonc les comandement de sainte yglise Et a doné et done lidiz Jehan de Chalon en nom de mariaige de ladite Ysabel sa fille à devantdit Loys treze mile livres de bons petit tornois noirs de la valour à temps de la confection de ces lettres à paier et à rendre es termes cy après dessouz escript et ordené c'est à savoir doux mile livres à la feste saint Martin pruchainement venant et autres mil livres à Pasques ensigant et à la saint Martin d'yver dou treizieme an de l'eaige de ladite Ysabel quatre mile livres et dois enqui en après à chescune feste de saint Martin d'yver de an en an doux mile livres tantque à tantque ladite some d'argent fut parpaiée entierement adit Loys Et auxi a promis lidiz Loys de rendre et de restituer ladite some d'argent de treze mile livres ou caus ouquel restitucion de mariaige se devroit faire la premiere année quatre mile livres et l'année ensigant quatre mile livres et chescune anné[e] ensegant doux mille livres jusque ladite some d'argent fut parpaiée entierement Et done lidiz Loys en doayle ou en donacion faite pour raison de noces mil livrées de terre et les chestiaux les bours et les maisons fors les fiez et rerefiez de Yverdon et de Morge et toutes les appendises et appartenances desdiz leus à ladicte Ysabeal desques choses elle doit avoir à sa vie soulement les usfruiz en tel maniere que chestiaux maison fors fiez ne rerefiez ne doivent estre comptez en estimacion de rente ou d'assise de rente Ces covenances a promis li une partie à l'autre tenir et garder toutes les choses et covenances dessusdites et chescune d'yceles senz venir encontre Et per cest mariaige façant paiant et rendent lidiz Loys ne ladite Ysabel ne lour hoirs ne puent riens demander en la succession dou pere ne de la mere de ladite Ysabeal ne de l'arcevesque de Besençon frere doudit Jehan ne de la contesse de La Marche tante de ladite Ysabel se n'estoit de la volunté desdiz pere et mere de ladicte Ysabeal tant come lidiz Jehans auroit hoirs masles vivant et en quitte lesdiz hoirs masles et lour hoirs descendanz de lour cors Et pour plus grant surté des devantdites choses tenir garder et acomplir lidiz Jehans a donés plages en la main doudit Loys pour paier et rendre ladite some d'argent c'est à savoir mons Girart d'Arguel mons Huede signour de Montferrant chevaliers de mil livres chescun à paier à premier terme dessus devisé mons Roul conte de Nuefchestel de mil livres à paier à l'autre terme segant mons Guillaume de Joinvile signour de Jay mons Jehan de Monz mons Jehan de Jouz signour de Bayoies mons Pierre de Husies mons Jaique de Noseroy mons Jehan de Chaffoy mons Huede de Thoraise mons Estene Lanceron de Fertens chevaliers chescuns de cinc cens livres à paier à tier terme après ensegant et mons Henry signour de Husyes de mil livres à quart terme après ensegant item lidiz mons Roul de Nuefchesteal et mons Jehans de Monz de ladite some dou premier terme et dou segont paier et rendre à cesdiz termes Lesquex plages se sunt estaubliz plages paiours et rendours par lour soirement doné sus sains evangiles en la maniere que dessus est escript lesquies lidit Jehans a promis en bone foy de garder de touz domaiges Et pour le remanant de ladite some de treze mille livres paier et rendre es autres termes dessusdit et especialment toute ladite some doit lediz Jehans baillier et doner plaiges adit Louis le dalphin de Viennois mons Beraut signour de Merquel mons Jehan conte de Forois mons Guichars signour de Biaujuef monseignour Hugue de Vienne signour de Paigney ou trois de lours ou autres bons plages et soffisant Et est à savoir que li premiers plaiges dessus nommés se lidiz Jehans deffailloit de paiement es devantdiz termes si come il sunt specifiez pour chescun plaige doivent et ont juré torner en hostaiges à la requeste doudit Loys ou de son comandement après les termes où il deffadroient de paier es Clées et après ce qu'il auroient demoré quinze jours en hostaiges doivent boillier gaiges portables et metables à la value des somes esdiz termes specifiés et devisées Et li autres plages que lidiz Jehans doit baillier doivent tenir hostaiges à Lyon si avenoit qu'il deffaillit de paier laquel chose n'aviegne et baillier leitres desouz les seaux le roy de France Et lidiz Loys a promis de doner plages de la restitucion doudit mariaige en la main doudit Jehan c'est à savoir lesdiz Beraut signour de Merquel Jehan conte de Forois Guichart signour de Biaujuef Hertaut signour de Roisillon et messire Haymars de Poittiers ou trois de lours ou autres bons plages liquex doivent auxi baillier bones lettres sus ce dessouz le seaul le roy de France Et tanque ce fut fait et acompli de part ledit Loys lidit Jehans ne seroit tenuz de riens paier adit Loys doudit mariaige Et se ansi avenoit que lidiz Jehans feist ou sustenit couz domaiges despens ou interest por raison de ladite restitucion lidiz Loys et sui plages saroient tenuz de luy rendre et restituer et en saroit creuz per sa simple parole senz autre prueve Et à ces choses s'est consentiz Hugue de Chalon fiz doudit Jehan et juré sus sains euvangile de tenir et garder à son pooir et non venir encontre Et lidiz Jehans doit curer et procurer que dame Marguerite de Bourgoigne dame d'Allay sa fame louera et consentira ces choses et jurera de garder et de tenir Et ont promis lidiz Jehans et les plages dessus nommez rendre et resarcir adit Loys touz couz domaiges despens et interest qu'il sustendroit pour deffaut de paiement et des choses dessusdites et en saroit creu per sa simple parole senz autre prove Et ont obligié lidiz principaux et lesdites plages et paiours et principaux dessus nommez touz lour biens muebles et non muebles presenz et à venir pour garder toutes cex choses [] Ce fut fait l'an le jour l'indicion le mois et le leu dessusdit presenz religious homes Symon per la grace de Deu abbé de Baume de l'ordre saint Benoit Guillame dou Mont Sainte Marie de l'ordre de Citiaux abbez mons Amé de Montaguz signour de loys et maistre Jehan de Forax clerc et mons Guillame Chantenay et mons Pierre de Moyrei chevaliers et plusours autres tesmoins à ce apelez et requis Et nous ont prié et requis lesdites parties et les plages dessus nummez que de ces choses feissiens instrument publique et seignessons de noz seingz ensamble lour seaux Et nous lidiz Jehans Loys Roul G de Joinvile Jehans de Monz Girars d'Arguel Huedes de Monferrant Henry J de Jou Pierre d'Usies Hude de Thoraise Lanceron Jaques et Jehans de Chaffoy pour plus grant surté avons mis noz seaux en ces lettres en tesmoing de verté ensamble les saings desdiz tabellions Et je Oudet de Loule de la dyocese de Besençon de l'auctorité de l'emperaour publiques notaire ay estez à toutes ces choses et ay fait et escript et mis mon saing [] Et je Hugues de Varrages de la parroche de Saint Rambert de Jou de la dyocese de Lyon de l'auctorité l'emperaour publiques notaires ay esté et mis mon seing []