Charter Document - 02220515

Nous Robert dux de Bourgoigne faisons savoir à touz ces qui verront et orront ces lettres que come noble dame madame Biatrix fame jadis de noble baron Hugue duc de Bourgoigne nostre chier pere sept mille livres de tornois esquies elle disoit nous à li estre tenuz pour cause de prest tant en lettres seelées des seaux de très haut et très excellant persone nostre chier seignour le roy de France quant en autres lettres seelées de nostre seal nous demandast de rechiez quatre mille livres de tornois lesquies elle disoit qu'ele devoit avoir et panre c'est à savoir doux mille livres suz nos bois d'Argilley et doux mille livres sus les bois de Monbart selon ce que il estoit contenuz es lettres seelées des seaux des devantdiz nostre chier pere de l'evesque d'Othon dou nostre et de ladite madame Biatrix devant ce que nous fussiens dux de rechiez quatre mille livres de tornois esquies estoit tenuz à ladite dame Biatrix messires Hugues de Bourgoingne çay en arriers nostre chier freres pour cause de prest item IX mille livres de tornois esquies lidiz Hugues estoit tenuz à la devantdite madame Biatrix pour ce qu'elle l'avoit delivré et aquitté et devoit delivrer et acquitter desdites IX mille livres envers le conte et la contesse de la Marche sa fille et suer çay en arriers doudit mons Hugue nostre frere esquiex IX mille livres lidiz nostre freres estoit tenuz à ycels por le mariaige de ladite contesse con il est contenuz es lettres seelées dou seal doudit Hugue lesquies debtes de quatre mille et de nuef mille livres dessusdites ladite madame Biatrix nous demandoit pour ce qu'elle disoit que nous teniens et possidiens les biens qui furent doudit Hugues à ly obligiez por raison de celx dites debz lesquiex debtes elle a afermé per son soirement donez sus sains euvangiles de Deu corporelment estre bons et leaux et fait senz fraude segon ce qui est contenuz es lettres dessusdites seelées dou seal doudit Hugue nostre frere et nous à ladite madame Biatrix demandessiens une grant some de deniers pour raison des diesmes et des foaiges de sa terre et de la terre qui fut adit Hugues nostre freres à la parfin sus les choses dessusdites acort est fait entre nous et ladite Biatrix en la maniere qui s'ensuet que por ce que nous avons quitté et quittons ladite madame Biatrix et ses hoirs et les homes de la terre qui fut adit Hugue nostre frere des diesmes et des foaiges dessusdiz et por huit mile livres de tornois desquex elle ha recongneu que nous li avons fait son gré ladite madame Biatrix nous a quitté et quitte toutes les somes lesquies elle nous demandoit si con il est dessus dit et nous ha boilliés les lettres de sept mile livres dessusdites seelées des seaux le roy et le nostre et les lettres des quatre mille livres et des nuef mile livres dessusdites seelées dou seal doudit Hugue nostre frere Et nous baille quitte et outroie de tout en tout ladite madame Biatrix et à noz hoirs touz les droiz toutes les actions et toutes les raisons que ele a puet et doit avoir encontre nous et contre toutes autres persones por raison des doux mile livres lesquies ele disoit qu'elle pooit avoir sus les biens de Mombart si con il est dessus dit et por raison des debtes des quatre mile livres et des nuef mile livres contenue[s] es lettres seelées dou seal adit Hugue nostre frere dessusdites fuers que contre sa amée fille nostre chier suer Ysabel çay en arriers royne de[s] Romains contre laquele ou à laquele nous ne poons riens demander por raison des choses dessusdites ou por raison de la cession et quittance dessusdites Et pour ce que ladite madame Biatrix ne nous boille mais retient riere li les lettres dessusdites façant mencion de doux mile livres sus les bois de Mombart elle les promet monstrer et à faire copie à nous toutes les fois que mestier nous sera et qu'elle en sera requise soffisanment Encor ha promis baillier et metre en save main et en sequestre toutes les lettres qu'elle a et aura des paiement desdites IX mile livres faiz et affaire à li à conte et à la contesse dessusdiz en tel maniere que elle et nous nous en puissons [aidier] quant à nous et à li sera mestier Et cum la devantdite madame Biatrix des devantdites huit mile livres de tornois que nos li devons et avons doné per la raison des quittances qu'elle nous a faites devantdites ait recogneu que nous li en avons fait son gré et li bone foy que elle ha à nous ne li doige nuire ançois aidier sadite recognissance non obstant nous recognoissons par nostre soirement pour ce fait et doné sus sains euvangiles de Deu que encour sunt et demorent à paier à ladite madame Biatrix desdites huit mile livres de tornois cinc mil huit cenz et dix livres de tornois lesquies cinq mil huit cenz et dix livres de tornois nous sumes tenuz et prometons per nostredit soirement rendre et paier à ladite madame Biatrix et es suens ou à lour comandement à Chestoillon es termes cy dessoz nommez c'est à savoir es trois semaines de Pasques pruchainement venant huit cenz et dix livres de tornois et à la feste de Touz Sains ensigant mil livres de tornois et es trois semaines de Pasques ensigant mile livres de tornois et ensi chescun anz à chescun des termes dessusdiz mile livres de tornois jusque à ce que ladite madame Biatrix soit entierement paié desdites cinc mil huit cenz et dix livres de tornois dessusdites Et si ansi estoit que nous deffaillisons es paiement dessusdit ou en acun d'ycels touz domaiges et interest que ladite madame Biatrix sostanroit pour ce et qui saront loialment prové nous li sumes tenuz per nostre dit soirement ensamble l'argent dessusdit et en obligons pour ce à ladite madame Biatrix et à ses hoir nous et nos hoirs et tous nos biens presens et à venir En tesmoignaige desquies choses dessusdites nous avons mis nostre seal en ces presentes lettres et avons requis honorable pere en Jesus Christ Hugues per la grace de Deu evesque d'Othon que il mete son seal en ces presentes lettres avez le nostre seal et nous Hugues per la grace de Deu evesque d'Othon à la requeste doudit duc avons mis nostre seal en ces lettres avez le seal doudit duc en tesmoignaige de verité C'est fait et doné à Muhulé desouz Vergier l'an de grace mil CCIIIxx et quatorze ou mois de novembre le sambadi après l'uictive de la saint Martin d'yver