Charter Document - 02220514

A touz ces qui verront et orront ces presentes lettres nous Biatris de Bourgoigne contesse de la Marche [et] d'Angoulesme salut en Nostre Signour Sachent tuit que nous donons et doné avons à noble home et saige nostre chier nevour mons Hugue de Chalon chevalier fiz de très noble home mons Jehan de Chalon signour d'Allay et es hoirs descendant de sa char tout le droit toute la raison que nous aviens et avoir poiens envers très noble home nostre chier signour et frere mons Robert jadix dux de Bourgoigne et [que] avons et avoir poons vers nostre chier signour et nevous Hugue duc de Bourgoigne pour raison dou testament de très noble home nostre chier frere mons Hugue duc de Bourgoigne cui Dex absoille jadis signour de Montreal lequel testament nous ne savions mie ne n'estoit venuz à nostre coignissance ou tems et à l'oure que nous feimes composicion sus l'eschoite de nostre chiere niece Biatrix fille doudit mons Hugue nostre frere Et si ansi estoit que Dex ne vuille que lidiz messires Hugues de Chalon nostre chier nevoul morut senz hoirs de son cors nous donons à Jehan son frere nostre nevoul touz le droit dessus nomez Et ce nous faisons savoir à touz ces qui apertient ou puet apertenir per ces presentes lettres seelées de nostre seal donées le londi après la nativité Nostre Dame l'an Nostre Signour mil trois cenz et onze