Charter Document - 02220510

Je Symons de Jonvile sires de Jayz fais savoir à touz ces qui verront ces presentes lettres que come entre moy et mon chier uncle Estiene signour d'Oiseler fussons diseours des parties es enfant li noble baron mon très chier signour et frere Jehan çay en arriers conte de Bourgoigne et signour de Salins par ansi come il est contenuz es lettres qui faites en furent je dis et reconois que Blaterens et les appendises est et doit estre à la partie et à la signorie dou chesteal d'Arlay et dou chesteal de L'Estoille lesquelx chestiaux ensamble les appendises et lour signorie nous avons rendu et fait delivrer come diseours es enfant doudit noble baron que il hout de la noble dame Lore çay en arriers fille mons Symon de Commercey sa derniere fame Et avec ce est et doit estre es enfanz que lidiz cuens mes sires hout de ladite Lore li fié d'Abens si come il estoit à devantdit conte mon signour par nostre dit et comant à signour d'Abbens come diseours qu'il en entroit en l'omaige es enfant de la devantdite Lore En tesmoignaige de laquel chose je ay mis mon seal en ces presentes lettres qui furent faites en l'an de Nostre Signour mil CC et sexante et nuef ou mois de may