Charter Document - 02220507

Nous Jehans cuens de Bourgoigne et sires de Salins faisons savoir à touz ces qui verront ces presentes lettres que nous avons volu et ordené en nostre derreeinne volunté que cils qui ont riens en nostre puis de Salins qui ne sunt de l'acort que nous feismes à acons de ces de la vile de Salins que il soient à cel acort et qu'il preignent ansi come cilz qui de l'acort sunt Et volons et comandons que de nostre rente de Salins que l'on doint à nostre maignie pour lour servise tanque à trois cenz livres à regart nostre nevour le seignour de Monfacon et de ces CCC livres l'on doint à Hugonete fille mons Jacon de Nasey quarante livres pour li marier Après donons et outroions à l'iglise de Chestel Challon nostre partie dou banc d'aost de Lahons et nostre hoir qui Chestel Challon tanront tiennent et gardoient à ladite yglise toutes les lettres que de nous a Après volons et comandons que nostre hoir quitoient et donoient à l'yglise de Baume demies nostres vignes de Crest et de Sincins et volons que nostre hoir emendoient les domaiges que nous avons fait à Blaterens à seignour de Ruffey et à ces cui fait les avons Et volons et comandons que ce que messires Girars d'Aresche et Defli sa fame proveront que nous tenons de lour heritaige qu'il lour soit rendu Et est à savoir que nous avons doné outroié et baillié à noz enfant que nous avons de la contesse Lore en acressement de lour partie toute nostre vasselemente d'argent en quelque leu que elle soit et noz eniaux et noz pierres noz joiaux et noz gaiges d'argent que nostre nies li sires de Monfacon a en gaige de nous pour cenz et cinquante livres Et avons doné et outroié à Marguerite nostre fille que nous avons de la contesse Lore pour li marier doux cenz et cinquante livrées de terre que nous avions ou puis de Salins des six cenz livrées de terre que nous avions retenuz es doux mille livrées de rente qui sunt en la partie Hugue conte de Bourgoigne nostre fil Et volons et comandons que tantost après nostre decès nostre honoraubles peres Vuillames par la grace de Deu arcevesque de Besançon et Hugues cuens de Bourgoigne nostre fil preignent trois mille livres sus nostre rente de Salins c'est à savoir sus la partie es hoirs que nous avons de Mahaut nostre premiere fame mil livres et sus les hoirs que nous avons de Ysabel nostre seconde fame mil livres et sur les hoirs que nous avons de dame Lore nostre tierce femme mil livres pour emender noz clains et se plus montoient nostre clains le sorplus paoient et emendoient nostre hoir selon ce que il partent Et volons que ce vaille comme nostre derreinne volunté En tesmoing de ces choses nous avons mis nostre seal pendant en ces lettres Ce fut fait le mardi après la nativité Nostre Dame l'an de l'incarnation Nostre Signour qui corroit par mil doux cenz sexante et trois