Charter Document - 02220506

Nous Jehans cuens de Bourgoigne et sires de Salins façons savoir à toz ces qui verront ces presentes lettres que nous donons outroions assignons et baillons à noz enfanz que nous avons et aurons de la contesse Lore nostre fame qui fut fille mons Symon de Commercy la foresterie la signorie la jostise et la garde de toutes noz jouz quelque part que nous les aions dois la vile de Cernans en amont Et volons que cil qui sera sires de Noseroy que il ait la devantdite garde signorie justise et foresterie desdites jouz Et ce outroions nous esdiz enfanz en lour partaiges que devisé lour avons de noz biens sau ce que nous volons que li usaiges desdites jouz et de touz noz bois quelque part que il soient soit adès saul et franc à nostre poiz et à nostre salnerie de Salins Et lour donons assignons et outroions encour quanque nous avons comquerrons et edifierons et quanque nous avons aquis et edifié dois Viler tanque à Losanne et dois Morenant tanque à Prangin en fié en demeneures sau ce que nos volons que toutes les devantdites choses soient dou douaile à la devantdite Lore contesse nostre fame tant come elle vivra En tesmoignaige de ces choses nous avons mis nostre sael pendant en ces lettres et à nostre priere et à nostre requeste li religious hons et honeste Wachiers abbes de Goile ha mis son seal pendant en ces lettres avez le nostre seal en tesmoing de verté Ce fut fait le mecredi après feste sainte Lucie l'an Nostre Seignour qui corroit par mil et doux cenz et sexante et siex