Charter Document - 02220505

Je Hombers prevoires fiz Noiret de Meges fais savoir à touz que je non mie deceu ne baraté ne menez par force ne par barat ne par paour mais de ma bone volunté ay doné quité et outroié en nom de donacion faite entre les viz senz rapeler à noble baron mons Jehan de Chalon signour d'Allay et à ses hoirs en recompensacion des grant biens que il et sui ancesour m'ont fait tel droit et tel raison come je ay puis et doy avoir es molins de l'Oule qui sont assis entre Meges et Eserval la Combe et ou molin et en la foule dou leu que l'on appele Fraynias et ou molin de l'estant dou Biez dou Fourt lesquies je devoie tenir en ma vie pour ce que je les avoie fait et edifiez à mes despens en la terre doudit mons Jehan En tesmoing de laquel chose je ay mis mon seal pendant en ces lettres et ay requis le discret home mons Richart de Salins qu'il mete son seal en ces lettres avez le mien Ce fut fait l'endemain l'ascension Nostre Signour l'an mil CC octante et sept