Charter Document - 02220499

Nos Jehans de Chalon sires d'Allay et Richars sires de Chestoillon en Varas faisons savoir à touz que nous de nostre propre volunté avons eschangié li uns à l'autre entre nous les choses cy après nommées en la maniere qui s'ensuit c'est à savoir que nous lidiz Jehans par titre et par maniere de loial permutacion baillons delivrons assetons et assignons pour nous et pour noz hoirs adit Richart seignour de Chestoillon et à ses hoirs en noz rentes dou puis de Salins vint et quatre livrées de terre en estevenens ou en petit tornois ou en menoie coursable corrant pour denier en l'arceveschié de Besençon lesques vint et quatre livrées de terre nous promettons rendre et paier et faire paier chescun an adit mons Richart et à ses hoirs de noz rentes dessusdites à la mi karoime Item nous lidiz Jehans en maniere et par titre de permutacion dessusdite avez les vint et quatre livrées de terre dessusdite avons baillié et delivré adit Richart un bichet de froment à la mesure de Ceys et huit solz chescun an de rente lesquex bichet de froment et huit solz nos avons chescun an de rente sus les mès et sus les homes que lidiz Richars ha à Refranche et volons et commandons esdiz homes que il en respondent et paoient adit Richart et es suens dois cy en avant permaignablement en la maniere et en la forme que il nous en estoient tenuz en tel maniere que lidiz Richars lesdites vint et quatre livrées de terre et le bichet de froment et les huit solz dessusdit tient et doit tenir de fié de nous en acressance de l'autre fié que il tient de nous c'est à savoir ce qu'il a en Refranche et es appartenances Et se ensi estoit que jà ne soit que lidiz Richars ou li suens ne peussent estre paiez ou ne fussent desdites vint et quatre livrées de terre en noz rentes dou puis dessusdit chescun an audit terme ou per raison de contenz qui venit ou puis ou par deffaute ou par autre achoison quel qu'elle soit nous lidiz Jehans donons et prometons par nostre soirement et par loial stipulacion sus ce fait adit Richart assigner en leu suffisant et covenable autre part ausi près de Chestoillon con Salins est lesdites vint et quatre livrées de terre chescun an et rendre et paier adit Richart et es suens et amender touz deffaut et touz domaiges qu'il hauroit sostenuz pour le deffaut dou paiement que ne li auroit esté fait desdites vinz et quatre livrées de terre Et je lidiz Richars sires de Chestoillon par titre et en maniere de permutacion dessusdite doing baillois et delivrois adit Jehan de Chalon mon très chier et bien amé seignour et es suens pour les choses dessusdites que il m'a doné en nom de permutacion dessusdite quanque je ay puis et dois avoir en la vile de Myon ou terretoire et es apartenances d'yceleu en homes en mès en terres en prez en chans en chasaux en dymes en bois en rentes en justises et en toutes autres choses quex qu'elles soient sauz les fiez que je ay et doy avoir à Myon ou terretoire et es apartenances lesques je retien à moy et es miens c'est à savoir le fié que Richars de Myon tient de moy à Myon et ou terretoire item le fié que cil de Fertens tiegnent et doivent tenir de moy item ce que messire Estiene de Chantenay tient à Myon et ou terretoire en fié de moy item le fié que Vuillemins fiz à la Douce de Myon tient de moy lesques fiez pour raison de la permutacion dessusdite j'ay repris en fié dou devantdit Jehan de Chalon mon amé seignour en acressance dou fié que je tien de luy asi come il est dessus dit en tel maniere que lidiz Richars de Myon li suens et sui homes et li homes mons Estiene de Chantenay ont et doivent havoir es bois de Myon et en toutes les raiz et les communes lour droit lour usaiges et lour raison pour panre pour essertaiges pour pastoraiges par tout et pour toutes lour aisances asi come il hont usé tenu et fait dois cy en arriers et ne doivent porter bois à Salins se li autres dou communal de la vile ne li portent Et puent lidiz Richars de Myons et messires Estienes abergier et metre homes en lour mès et en lour terres ansi come il ont fait et usé dois cy en arriers et en tel maniere que je lidiz Richars de Chestoillon ou cil qui tanront les molins et la fole de Patancel haie havons et devons avoir es bois de Myon pour les molins et pour la fole l'usfruit et l'usaige pour marrenaige pour faire esclose et pour toutes atres choses qui seront necessaires esdiz molins et à la fole En tesmoignaige de laquel chose nous li devantdiz Jehans de Chalon et Richars de Chestoillon avons mis noz seaux en ces presentes lettres faites et donées l'an Nostre Signour corrant par mil trois cenz et doux ou mois de janvier