Charter Document - 02220498

Nous officiaux de la court de Besençon faisons savoir que nobles hons messires Jehans de Chalon sires d'Allay et de Naele d'une part et messires Girars d'Arguel chevaliers tuterres et avoiers de Jehan de Chanvenz pupille fiz jadix de Hombert de Chanvenz escuier en non de toutour ou d'avoier de celuy Jehan d'autre part lesdites parties ont confessé et publiement recongneu en droit par devant nostre comandement qu'il ont hau et fait entre lour les covenances les pactions et les eschange des choses cy après escriptes nommées et devisées c'est à savoir que lidiz messires Girars en non de toutour et d'avoier doudit pupille pour li et pour ses hoirs et pour ces qui cause auront de luy a baillié quitté outroié et delivré adit mons Jehan de Chalon pour luy et pour ses hoirs presant et recevant perpetuelment tout ce que lidiz pupilles avoit avoir pooit et devoit per quelque cause ne meniere que ce fust es viles de Lemuy dou Larderoy de Champaignole de Cienz et de Escuvillon es parochaiges es finaiges es terretoires et es appendises desdites viles en homes en fames en mès en maisons en tailles en censes en rentes de terres en prey en deniers en corvées en fours en molins en aigues en justice en signorie grant et petite et en toutes autres choses quex qu'elles soient ne coment que elles soient appelées ne nommées senz riens retenir Item li ay baillié quitté outroié et delivré cinq buillons de bois que lidiz pupille avoit pour vendre à Salins lay où li plasoit Toutes les choses dessusdites sunt dou franc aluef doudit pupille Et d'autre part lidiz messires Jehans de Chalon pour luy et pour ses hoirs et pour touz ces qui cause auroient de luy en eschange par titre en nom et en maniere d'eschange et en recompensacion des choses dessusdites a doney quitté outroié et delivré perpetuelment adit mons Girart en nom que dessus present et recevant quatre vint et dix livrées de terre à estevenens de annuel et perpetuel rente lesquex quatre vint et dix livrées de terre lidiz messires Jehans de Chalon a assigné et assis adit mons Girart en nom que dessus c'est à savoir sexante livrées de terre que lidiz messires Jehans tenoit sus le communal de la salnerie de Salins pour l'eschange de la sixte partie de la Domainne à lever panre et recevoir es quatre quartans de l'an à chescun quartens quinze livrées d'estevenens item et trente livrées de terre à estevenens sus la rente que il tenoit sus le communal pour raison de la rente de Durney à panre lever et percevoir chescun anz c'est à savoir dix livres à la feste saint Ylaire et vint livres à la nativité saint Jehan Baptiste En tesmoignaige de laquel chose nous avons mis le seal de nostre court avec le seal doudit mons Girart Ce fut fait et doné le mecredi devant la feste saint Nicolas d'yver l'an de grace corrant par mil CCC et treze ou mois de decembre