Charter Document - 02220497

Je Girars d'Arguel chevaliers fais savoir à touz que come tutour et en nom de tutour de Jehan de Chanvens damoiseal en nom de luy pour luy et pour ses hoirs cui il apartient ou apartanra ou tems à venir ay eschangié et eschange en nom de permutacion pure à noble baron et puissant mon très chier signour mons Jehan de Chalon signour d'Allay et de Naelle pour luy et pour ses hoirs qui cause auront de luy touz quanque lidiz Jehans de Chanvens posside ha puet et doit avoir es viles de Lemuy dou Larderet et de Champaignole es appendises et es apartenances d'yceles c'est à savoir en homes en prey en chans en bois en communes de terres en aigues et decours d'aigues justices et signories et en toutes autres choses quelx qu'elles soient et coment qu'elles puent estre apelées Item li ay encores eschangié en nom que dessus tout le droit action et raison que lidiz Jehans puet et doit avoir en cinc buillons que il puet vendre à Salins chescun an quelque part que il li plait ou en la salnerie communal ou au borc le conte de Bourgoigne se y li plait entre feste à Touz Sains et la nativité Nostre Signour ensigant Et ces choses dessusdites je lidiz Girars chevaliers ay delivré en nom d'eschange et de permutacion adit mons Jehan de Chalon en nom que dessus ou à ces qui auront cause de luy pour quatre vint et dix livrées de terre lesqueles sunt assises ou puis de la salnerie de Salins et furent eschangiés es seignours communax de Salins sus le sixte de la Domainne que mesdiz sires de Chalon aquist de Jehan de Rens et les autres trente livrées de terre furent aquises de Jehan de Charencey lesquelx movoient de part sa fame et dou lou et consentement de ly de part la rant de Derney Et je lidiz Girars en nom que dessus regardanz et consideranz le bienfait et profit que lidiz messire Jehan de Chalon a fait adit Jehan de Chanvens fait puet faire et que promis li ha à tens à venir en recumpensacions restitucions et merites d'ycelx vuil ou outroie que se lidiz Jehans moroit senz hoirs naturax de son cors que toutes les choses dessusdites et une chescune d'ycelles eschangiés reviegnent franchement et demoroient à mondit seignour de Chalon et à ses hoirs et cognois vuil et confesse en nom que dessus que les choses dessus eschangiés et une chascune d'ycelles lidiz Jehans de Chanvens les doit tenir en fié et en chasement de mon devantdit seignour de Chalon En tesmoignaige de laquel chose j'ay mis mon seal pendant en ces lettres donées l'an Nostre Signour corrant [par] mil CCC et treize ou mois de juignet