Charter Document - 02220495
| Charter Number: | 02220495 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Exchange |
| Date: | 1308 |
| Date type: | Internal, Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.181) |
Charter:
Nous officiaux de la court de Besençon savoir faisons que Jaquez diz de Fustes citieins de Besençon a confessé en droit per devant nous et publiement cogneu luy pour cause d'eschange et de permutacion avoir baillié laissié quitté et outroié à touzjours mais à noble baron et puissant mons Jehan de Chalon signour d'Allay trois sues pieces de vignes assises ou terretoire de Bures desques li une est assise ou leu que l'on dit es Murgeraiz delez la vigne mons Girart d'Arguel chevalier d'une part et la vigne Estevenin dit Peque d'autre liquele vigne doit tant soulement à Guillaume d'Arguel escuier cinc deniers qui portent loux et justise [et] de rechiez [à] Jehan des Terraux quatre deniers qui ne portent point de loux ne de justise lesquex censes dessusdites sunt à paier chescun an par tout le mois de may li autre est assise en la coste de Buires delez la vigne à Barbier de Chamarz et doit à devantdit Guillaume escuier d'Arguel doux deniers de cense portant lox et justise à paier chescun an par tout le moy de may li tierce est assise ou terretoire devantdit ou leu que l'on dit ou Rebrait entre la vigne maistre Jehan de Haignens clerc de Besençon d'une part et la vigne çay en arriers Jaquet Bonvalet citiein de Besençon d'autre et doit à mons Girart d'Arguel chevalier cinc deniers une pujoise moins de cense portant loux et justise et un denier à la fame çay en arriers Richart d'Ornens à paier chascun an an tout le moy de may lesques pieces dessusdites de vigne lidiz Jaquet a bailliez adit mons Jehan de Chalon en non et en meniere d'eschange et de permutacion de trois pieces de vignes assises ou terretoire de Besençon lesquex lidiz messires Jehans de Chalon a baillié en la maniere que dessus adit Jaquet et à ses hoirs lesquex vignes furent es enfant à Fale de Besençon et estoient eschoites adit mons Jehan de Chalon En tesmoignaige de laquel chose à la requeste doudit Jaquet avons mis le seal de la court de Besençon en ces presentes lettres qui furent faites et donées l'an mil CCC et huit l'endemain de la saint George