Charter Document - 02220494
| Charter Number: | 02220494 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1302 |
| Date type: | Internal, A.D., Calendar, Papal |
| Resource Link(s): |
Patrimoine numérisé de Besançon - MS Droz 22 - Tome 2 (p.178) |
Charter:
Johannes domini pape camerarius venerabilibus et religiosis viris abbati monasteri Balerne Cisterciensis ordinis et priori prioratus de Joha ordinis sancti Benedicti Bisuntine dyocesis salutem in Domino Dudum magnificus vir dominus Johannes de Cabilone dominus de Allato in Romana curia constitutus a domino Symone [filio] domini Abbatis de Mannellis de Florentia mille centum sexaginta tres libras bonorum parvorum nigrorum turonensium mutuo habuit et recepit pro suis necessariis negociis et expensis quas quidem mille centum sexaginta tres libras turonensium parvorum idem dominus Johannes de Cabilone tanquam principalis et ejus precibus et mandatis quondam dominus Henricus archiepiscopus Lugdunensis dominus Symon quondam prior monasterii Sancti Albani Basiliensis dominus Richardus dominus de Castellione dominus Stephanus Gerardi de Monte Acuto et dominus Guydo Galafini de Pologneyo fide inhibentes in hac parte pro eodem domino Johanne de Cabilone ac se et quemlibet eorum in solidum principales debitores et pactatores memorate pecunie quantitatis constituentes reddere et restituere solempni stipulatione memorato domino Thomasio de Manellis certis loco et terminis constitutis integre promiserunt Cumque reverendus pater dominus Theodoricus tunc Pisanus electus domini pape camerarius nunc Civitatis papalis episcopus sancte Romane Ecclesie cardinalis in ipsum dominum Johannem de Cabilone ac fide jussores suos predictos superius nominatos excommunicationis sententiam ex tunc promulgavit in scriptis si deficerent in solutione et restitutione dicte pecunie quantitatis faciendis eidem domino Thomasio in loco et terminis constitutis procuratorum ipsorum ad hoc attendente expresso consensu et quia de prefata turonensium parvorum summa non fuit eidem domino Thomasio in constitutis loco et terminis integre satisfactum dictus dominus Johannes de Cabilone et ejus fide jussores predicti eamdem excommunicationis sententiam incurrerunt Quare fuit nuper pro parte ipsorum domini Johannis de Cabilone et fidejussorum ejus nobis humiliter supplicatum ut cum de prefata pecunie quantitate ac dampnis et expensis sit memorato domino Thomasio [filio] domini Abbatis de Mannellis de Florentia licet post terminos integre satisfactum providere ipsis in hac parte de opportuno absolutionis beneficio curaremus Nos igitur de satisfactione hujusmodi certificati ad plenum ac propter hoc volentes cum domino Johanne et ejus fidejussoribus misericorditer agere supra dictis discretioni vestre tenore presentium committimus et mandamus quatinus vos aut alter vestrum qui super hoc fuerit requisitus memoratum dominum Johannem de Cabilone et supra dictos fide jussores ejus et ipsorum quemlibet a prefata excommunicationis sententia auctoritate nostra juxta formam ecclesie absolvatis facientes ipsos si opus fuerit in ecclesiis opportunis per vos et alios sic absolutos publice nunciari In cujus rei testimonium presentes litteras fieri fecimus et nostri sigilli munimine roborari Datum Laterani XV kalendas maii anno Domini millesimo CCC secundo pontificatus domini Bonifacii pape octavi anno octavo