Charter Document - 02220493

Je Girars d'Arguel chevaliers fais savoir à touz que bien porveheuz et bien avisez non mie deceuz ne menez à ce per fraude done baille quitte et outroie à touzjours mais par non et par cause d'eschange à noble baron mon très chier et redoté seignour mons Jehan de Chalon signour d'Allay et à ses hoirs ma maison de Fontains et la vile avez toutes les apartenences et quanque je ay puis et doy avoir adit leu et à Liege soit en homes viles bois prez rivieres terres tailles censes justices et en toutes autres choses possessions et rentes quel qu'eles soient lesques choses sunt dou fié doudit mons Jehan et ce dou Liege est mons de Monfacon aquel il en acordoit dou fié si come entre lour convendra en eschange de la terre que lidiz messires Jehans m'a doné et assigney à ma vie soulement à Chalamont en Boujaille et en la terre de Chalemont Et le droit la proprieté la signorie et la possession desdites choses transporte et mete oudit mons Jehan et en ses hoirs et m'en suis dessasi et devesti En tesmoing de ce je ay mis mon propre seal en ces lettres donées l'an mil CCC et set le londi devant feste saint George