Charter Document - 02220492

Je Estevenins escuier çay en arriers fiz mons Guyon diz Govart chevaliers de Dommartin fais savoir à touz que je ay eschangé en nom d'eschange à noble baron et saige mon redoté signour Jehan de Chalon signour d'Allay toute ma partie que je ay et puis et doy avoir en bois en prey et en champs de la vile de Jerrayse et es terretoires et es apartenances de ladite vile liquex bois liquex prey liquex champs partent à Richart Martin de Poloingney de part sa fame ma cosine Et est à savoir que j'ay et doy avoir la moitié desdis boiz pré et chans et lidiz Richart ou nom dessusdit l'autre moitié laquel moie moitié desdiz bois prey et terres dessusdites j'ay baillié et delivrey baille et delivre en nom d'eschange ansi come dessus est dit à mon amé signour dessusdit luy et es suens pour moy et pour les miens pour quatre livrées de terre de monoie corsable en l'arceveschié de Besençon et pour vint livres de menuz tornois que j'ay eues et receues en bons deniers nombrez et m'en tien pour bien paiez lesquex quatre livrées de terre mesdiz sires m'a assis et assigné sus sa partie de sa rente dou gros de la tauble de la salnerie de Salins à paier et à rendre à moy et es miens chescune année à touzjours mais le jour de la nativité saint Jehan Baptiste Et se ansi estoit que jà ne soit que sa rente doudit puis venit en tel deffaut per acune occasion que je ou li miens ne nos puissiens paier de ladite rente mesdiz sires et li suens me doivent assiter moy et es miens le deffaut que je ou li miens auroient et recevroient sus toutes ses rentes de la ville de Regne et ensi come il est contenuz es lettres que je ay de mondit seignour doudit eschange Et recognois que je tieng en fié pour moy et pour les miens de mondit seignour et des siens lesdites quatre livrées de terre ensi comme je tenoie les bois les prez et les terres que eschangié li ay En tesmoignaige de laquel chose je lidiz Estevenins ay prié et fait metre en ces presentes lettres le seal de honorable chapitre dou chapitre de Saint Anathoile de Salins Faites et donées l'an MCCC et doux ou mois de join