Charter Document - 02220489

Nous Jehans cuens de Bourgoigne et sires de Salins faisons savoir à touz que con nous aiens doné et outroié à Jehan de Chalon signour de Rochefort nostre fil sept cenz livrées de rente en nostre poiz de Salins chescun an à temps qu'il estoit en nostre poesté de pere pour douer Ysabeal sa fame fille çay en arriers Mayhu duc de Loherainne nous li baillames et donames lesdites sept cenz livrées de rente en tel entencion et en tel maniere que lidiz Jehans hait et compoit après nous ladite rente en son partaige que doné et assigné li avons ou puis de Salins après nous en tel maniere que les parties à touz ses autres freres n'en y soient de riens grevées après nous Et ce volons nous que lidiz Jehans [ce] fait tiegne ne encontre ne viegne et à ce le obligons nous sus tel partaige con de nostres biens li doit advenir après nous En tesmoignaige de ceste chose nos avons mis nostre seal pendant en ces lettres et à nostre priere et à nostre requeste li religious hons et honestes Vachiers abbes de Goile a mis son seal pendant en ces lettres avec le nostre seal en tesmoignaige de verté Ce fut fait le mecredi après feste sainte Lucie l'an Nostre Signour qui corroit par mil CC et sexante et six