Charter Document - 02220485

Nous officiaux de la court de Besençon faisons savoir que personalment establiz nobles bers et puissant messire Jehans de Chalon d'une part et Amiet d'Abbens damoiseal d'autre part en maniere d'eschange et de permutacion ont fait et ont confessé en droit par devant nostre comandement lour avoir fait entre lour les covenances qui s'ensuegnent c'est à savoir que lidiz Amiet pour luy et pour les suens ou à ces qui de luy auront cause à touzjours mais a baillié quitté outroié et delivré adit Jehan pour luy et pour les suens ou à ces qui de luy auront cause sa maison de Molumbe ensamble les fonz et les appartenances d'ycele ses homes doudit leu et lour mex son estanc et son molin doudit leu le port pour faire le pont sus le Doubz et generament tout ce qu'il ha puet et doit avoir adit leu de Molumbe et en quelque chose que ce soit excepté son droit et son usaige qu'il ha et doit avoir en la reviere dou Doubz oudit leu lesquies lidiz Amiet retient à luy senz nule autre chose retenir à luy des choses dessusdites Et d'autre part pour les choses dessusdites bailliés quittées et outroiés et delivrées perpetuelment adit Jehan doudit Amiet especialment pour la maison que lidiz Amiet avoit à Molombe les homes lour mès et le port pour faire le pont en nom de eschange et de permutacion lidiz Jehans a baillié quitté et outroié et delivré pour luy et pour les suens à touzjours mais adit Amiet et es suens ou à ces qui auront cause de luy ses homes qu'il ha à Leu Deu dessoz Abbens et lour mès et lour choses qui s'ensuegnent cy après premierement un home que l'on dit Gratillet et son mès dou Leu Deu qui doit de la justice trois souz de la geline siex deniers dou cheneve doze deniers des corvées huit deniers de l'avoinerie demy bichet de trois soz item Renaut Theniot qui doit paier pour les costumes dessusdites huit solz et doux deniers item Jehannenet et son mès qui doit por les costumes dessusdites six soz et doux deniers item la Picarde et son mès qui doit por les costumes dessusdites huit solz et doux deniers item les enfans à Saignat et lour mès qui doivent por les costumes dessusdites six soz et doux deniers item le mès à la Gaie qui doit por les costumes dessusdites six solz et doux deniers item li Rosselet et son mais qui doivent por les costumes dessusdites six solz et doux deniers item li mès Hugues de Rens qui doit por les costumes dessusdites six solz et huit deniers item le mès Propoignet qui doit por les costumes dessusdites six solz et doux deniers item le mès à Partiet et li mès à Misselet qui doivent pour les costumes dessusdites quatre solz item le droiz que lidiz Jehans a es corvées des cherrues dou Leu Deu Item à Abbens la vile a quitté baillié outroié et delivré lidiz Jehans en la forme que dessus adit Amiet Besençon Macordon qui doit de la justise de doux mais six solz des corvées seze deniers et de une geline six deniers et dou cheneve doze deniers et de l'avoinerie un bichet et demy de nuef solz et ne doit li uns des mès fors que l'avoinerie item Estevenet d'Abbens la vile qui doit l'avenerie de quatre mès pour quatre emines quatre solz item Belin et son mès qui doit pour toutes les costumes dessusdites sept solz et doux deniers item le Proudon et son mès qui doit pour la justise trois solz item Renaut de Monz et son mès qui doit pour toutes les choses dessusdites six solz et doux deniers item Othenin et son mès qui doit pour toutes les costumes dessusdites six solz et dous deniers item Paguet et son mès qui doit pour toutes les costumes dessusdites huit solz et doux deniers item Epulon et son mès qui doit d'une emine d'avoine doze deniers item Vuillemin et son mès qui doit d'une emine d'avoine doze deniers item Ottenin et son mès qui doit d'une emine d'avoine doze deniers item la fame Crestin et son mès qui doit demi bichet froment et demi bichet avoine et trois solz de cens chescun an et quanque lidiz Jehans avoit pooit et devoit avoir es choses et es homes et lour mès dessusdit devant la confection de ces lettres pour quelque cause que ce fut Toutes les choses dessusdites sunt bailliés et delivrées adit Amiet doudit Jehan en eschange et en recompensacion de sa maison et dou traffont de Molombe des homes et de lour mès et dou port pour faire le pont de Molombe Item pour ledit molin et estanc de Molombe quitté baillié outroié et delivré perpetuelment adit Jehan et es suens doudit Amiet en recompensacion doudit molin et estan ha promis lidiz Jehans adit Amiet rendre et paier chescun an à la feste saint Andrey l'apostre vint bichet de froment mercheant à la mesure de Quingey lesquies vint bichet de froment lidiz Jehans assigne et a assigney adit Amiet et es suens chescun an à panre et recevoir es rentes et sus les rentes de ses molins qu'il ha de nouvel fait à Molombe et maismement sus le molin que lidiz Amiet a baillié quitté et delivré adit Jehan en ces lettres Et s'il avenoit que jà ne soit que lidiz molins fussent ars dessipez destruit ou despeciez par quoy lidiz Amiet ne peut avoir ne recevoir lesdiz vint bichet de froment chescun an es rentes ne sus les rentes desdiz molins per ensi come dessus li sunt assigné lidiz Jehans ha promis et est tenuz de rendre et de assigner en ses cens en ses rentes ou en ses tailles d'Abbens adit Amiet les vint bichet de froment dessusdiz à plus près d'Abbens lay où miex plairoit adit Amiet et covenablement à l'esgart de bones genz tanque lidiz molins fussent refait et lesdiz molins refait lidiz Amiet devroit panre lidiz vint bichet sus les rentes desdiz molins et quitter l'assignacion que lidiz Jehans li avoit faite autre part Et parmi ce lidiz Amiet doit et est tenuz deffendre à ses homes et d'yaux controindre qu'il n'aillent muedre autre part que esdiz molins et se il y aloient lidit Amiet est tenuz et promis l'a par sa foy de lever l'amende de trois solz de celuy ou de ces qui iroient muedre per tantes foiz come il yroient Et est à savoir que se lidiz Amiet estoit obligiez ou fut tenuz à acune persone en acune debte et cil à cui lidiz Amiet saroit tenuz requeroit ledit Jehan qu'il detenit ledit blef sasi pour sa debte lidiz Jehans ne saroit pas tenuz de tenir ledit blef sasi à la requeste de celui qui diroit que lidiz Amiet fut tenuz à luy Et a promis et ne doit faire lediz Amiet point de molin suz le biez dou molin qu'il ha bailliez adit Jehan qui tornoit ne torner peust à domaige ne à prejudice doudit Jehan En tesmoignaige des choses dessusdites nous à la requeste des devantdiz Jehan et Amiet faite à nous par nostredit commandement avons fait metre en ces presentes lettres le seal de la court de Besençon ensamble le seal doudit Jehan come lidiz Amiet afermast par devant nostredit comandement lui non havoir point de seal Doné le londi après le diemanche que l'on chante Oculi mei l'an Nostre Signour corrant per mil CCC et quatre ou mois de marz