Charter Document - 02220484

Nous officiaux de la court de Besençon faisons savoir que nobles bers et puissant messires Jehans de Chalon sires d'Allay d'une part et André sires de Roches damoiseaux d'autre part lidiz Jehans de Chalon en maniere d'eschange et de permutacion ay doney quitté baillié outroié et delivré pour luy et pour ses hoirs à touzjours mais adit Andrey signour de Roches et à ses hoirs ou à ces qui auront cause de luy vint livrées de terre de franc aluef de tel monoie come il corra per le temps en la citey et en la dyocese de Besençon lesquex vint livrées de terre lidiz Jehans de Chalon a assignées et assises adit Andrey et à ses hoirs [à] panre et à recevoir chescun an à la feste de l'invencion saint Estiene en ses rentes et sus ses rentes dou puis de la salnerie de Salins Et a comandez lidiz Jehans de Chalon per ces presentes lettres à ces qui ses rentes de la salnerie de Salins reçoivent ou recevront par le temps à venir que il chescun an adit Andrey ou à ses hoirs ou à ces qui auront cause de lours paoient bailloient et delivroient adit terme lesdites vint livrées de terre senz autre comandement atendre doudit Jehan de Chalon ne de ses [hoirs] desquex vint livrées de terre lidiz Jehans de Chalon pour luy et pour ses hoirs s'est devesti et ledit Andrey pour luy et pour ses hoirs en a envesti et mis en corporal possession ou auxi par la tradicion de ces presentes lettres Et se y avenoit que Dex ne vuille que lidiz puis de la salnerie de Salins par guerre par deffaut de bois ou par autre chose fussent à ce menez que lidiz Andrey ou li suens ne puissiens percevoir lesdites vint livrées de terre si come dessus est dit lidiz Jehans de Chalon ou li suens sunt tenuz d'assigner et d'asseoir adit Andrey ou es suens lesdites vint livrées de terre de franc aluef en la terre d'Abbens ou de Regne à l'esgart de bones genz Et d'autre part en recompensacion desdites vint livrées de terre bailliées quitées et delivrées doudit Jehan de Chalon adit Andrey si cum dessus est dit lidiz Andrey regardé en ce son evidant profit a baillié doné quitey outroié et delivrey pour luy et pour ses hoirs à touzjours mais adit Jehan de Chalon et à ses hoirs ou ces qui auront cause de lours les homes et lour meys qu'il ha à Biens à Four et Montanti c'est à savoir Girart de Biens et son frere et lour mex item Jehannin fiz Colin de Montanti et son meyx item Colin de Fourz et son mex item quanque lidiz Andrey ha puet et doit avoir esdites viles de Biens de Four et de Montanti es fons es appartenances appendises finaiges et terretoires d'ycelles en signorie et en justice haute et basse en maisons prey chans vignes chasax cultiz fours molins aigues decors d'aigues censes rentes corvées costumes et toutes autres choses queles qu'elles soient et coment qu'elles puissent estre appelées sau ce que des choses dessusdites lidiz Andrey retient à luy et es siens ses fiez de ses franches genz desdiz leus item son droit qu'il ha puet et doit avoir et avoit devant la confection de ces lettres ou meys de Labutel et ou mex à Duc et le droit que lidiz Andrey dit qu'il ha et avoit devant la confection de ces lettres en ce que messires Jehans de La Chassaigne sui hoirs ou sui partaiges ont vendu esdites villes ou acunes d'yceles ou eschangié adit Jehan de Chalon signour d'Allay lesquex choses lidiz Andrey doit prendre droitement par ledit mons Jehan de Chalon ou par sa court En tesmoignaige des choses dessusdites nous à la requeste des devantdiz Jehan de Chalon et Andrey faite à nous par nostre comandement avons fait metre en ces presentes lettres le seal de la court de Besençon ensamble les seaux des devantdiz Jehan de Chalon et Andrey mis en ces lettres faites et donées l'an Nostre Signour corrant par mil CCC et cinc ou mois de mart