Charter Document - 02220483

Nous Othes cuens palatins de Bourgoigne et sires de Salins faisons savoir à touz que nous regardant nostre grant et evidant profit de nostre bone volunté avons eschangiez et doné senz riens retenir à nous ne à noz hoirs à nostre amé oncle et feal mons Jehan de Chalon signour d'Allay acceptant et recevant pour luy et pour ses hoirs le giete d'Oyselle et tout ce que affier adit giete d'Oyselle c'est à savoir à Roches et à Torpe à Thoraise et en autres leus ensamble touz les droit doudit giete quels que il soient ne comant que il soient appelez et toutes les choses que nous avons poons et devons avoir à Oseylle et esdiz leus ou parochaige ou terretoire es partenances et es appendises desdit leus en fié ou rierefiez en bois en prey en chans en meys en aigues en cours d'aigues en pasquiers en pescheries en censes en costumes en droictures en actions en exactions en resort en loys en justices et toutes autres droitures quelx qu'elles soient ne coment qu'elles soient appelées Et comandons per ceste lettre à touz ces qui sunt nostre homes et en nostre homaige et qui doivent estre nostre homes pour raison de la signorie desdiz leus et doudit giete et des choses qui à ces choses apartieguent qu'il facent homaige adit mons Jehan senz atendre autre comandement de nous et en devienent sui homes en la forme qu'il estoient nostre homes pour raison des choses qu'il ont esdiz leus et pour raison des choses qui partiegnent adit giete pour lesques choses lidiz messires Jehans de Chalon sires d'Allay nos a eschangiez et donez en nom d'eschange pour lesdites choses les homes taillables que il a soit en demenure ou en partaige en la rue de Malpertuis de Salins où que il demoroient en ladite vile de Salins lesquies il a conquis de ces de Chays ensamble touz les droiz que il ha puet et doit avoir en ladite rue ne esdiz homes où que il demoroient à Salins ou en autre meniere Et nous lidiz Jehans de Chalon signour d'Allay avons eschangié et doné à nostre devantdit signour Othe conte palatin de Bourgoigne et signour de Salins acceptant et recevant pour luy et pour ses hoirs pour ledit giete et les autres choses dessus nummées nostres homes taillables que nous avons à Salins en la rue de Malpertuis ou autre part en la vile de Salins pour la raison de Malpertuis que nous avons conquis de ces de Chays Et si ansi estoit que nostre amez uncles et feaux messires Jehans de Monbeliart sires de Monfaucon veist que ces choses que nous avons eschangiés à nostredit amé signour pour ledit giete et les autres choses dessus nommées ne vallisent autretant come celes vaillent lesquies nous avons doné en eschange pour lesdiz homes nous ce qui en fadroit li devons asseoir ou val de Salins en nostre rente dou puis de Salins ou en autre chose à regart doudit seignour de Monfacon Et nous lidiz Othes cuens palatins de Bourgoigne sires de Salins et Jehans de Chalon sires d'Allay nous sumes devestu desdites choses et en avons envestu li uns l'autre de la chose qu'il ha eschangié En tesmoing de laquel chose nous avons mis nostres seaux pendant en ces presentes lettres faites et donées l'an Nostre Signour mil CC nonante et trois ou mois de novembre