Charter Document - 02220482

Nous Jehans de Chalon sires d'Allay et Jehans de Belevevre sires de Chayz faisons savoir à touz que nous regardant et considerant nostre evidant profit avons fait entre nous permutacion et eschange des choses cy dessoz escriptes c'est à savoir que nous lidiz Jehans de Belvevre sires de Chays avons bailliez et delivrez adit mons Jehan de Chalon pour luy et pour ses hoirs permaignablement tenir et avoir toutes les choses et les droiz que nous avons et devons avoir en la ville de Myon et ou parochaige et es appartenances c'est à savoir en homes en terres arables et non arables en prey en bois en aigues en justices en signories et en toutes autres choses queles qu'eles soient et coment qu'elles soient appelées Et nous lidiz Jehans de Chalon en nom de permutacion et d'eschange des choses dessusdites avons bailliez audit messire Jehan de Belevevre signour de Chais pour luy et pour ses hoirs tenir et percevoir permaignablement vint livrées de terre sus nostre rente dou poys de la salnerie de Salins chescun an à la feste saint Michiel l'arcange lesquies vint livrées de terre lidiz messires Jehans de Belvevre sires de Chays tient et doit tenir en fié de nous et de noz hoirs En tesmoignaige de laquel chose nous avons mis noz seaux pendans en ces presentes lettres faites et donées à Salins l'endemain de la feste de la Magdeleine l'an mil CCC et deux