Charter Document - 02220478

Nous Hugues sires de Rens faisons savoir à touz ces qui verront ces presentes lettres que con Jehans de Rens nostre fil et Clemence sa fame aient engagiez enloiez et bailliez en la main la noble dame Lore fame çay en arriers le noble baron Jehan conte de Bourgoigne et signour de Salins lour chestel de Saint Agne et les appartenances doudit chestel et les fiez doudit chestel que sunt de son fié lige pour cinc cenz livres de tornois et pour cinc cenz livres d'estevenens nuef et pour dous cenz livres d'estevenens nuef assimant se ladite Lore despendoit lesdites doux cenz livres pour l'ediffiement ou pour le refermement doudit chestel nous ladite gagiere et ledit enloiement et ladite baillance ensi con faite l'ont li devantdiz Jehans et Clemence sa fame en la main à ladite dame Lore ensi con les lettres qui faites en sunt que ladite Lore ha des devantdiz Jehan et Clemence sa fame le devisent volons outroions et louons et prometons à ladite Lore par nostre soirement doné sus sains euvangiles corporelment que nous contre ladite gagiere et ledit enloiement et ladite baillance ne vanrons par nous ne par autruy ne soffrirons que autres y viegne Et comandons à touz ces qui fié tiegnent de nous et qui sunt en nostre homaige par raison doudit chestel que il ledit fié facent à ladite Lore et en entroient en son homaige ensi come il sunt ou nostre et nous les quittons doudit fié et dou servise que il nous doivent pour raison doudit fié tant con ladite Lora tanra ledit chestel en gaige En tesmoignaige de ceste chose nous avons mis nostre seal pendant en ces lettres qui furent faites le mecredi après l'assumption Nostre Dame l'an Nostre Signour mil CC septante et quatre