Charter Document - 02220476
| Charter Number: | 02220476 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1275 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.123) |
Charter:
Je Symonin chevaliers fiz mons Richart de Neblens chevalier signour de Nores fais savoir à touz que je ay eu et receu à emprunt de ma très chiere et bien amée dame Lore fame çay en arriers le noble baron Jehan conte de Bourgoigne et signour de Salins doux cenz livres de viennois bons et loiaux pour laquel some d'argent je ay enloié mis et engagié en la main de ladite Lore quanque je ay à Mainnay et à Vilars en homes en prey en champs et en toute autres choses en quelque maniere que je les y aie et puisse et doie avoir lesquex choses sunt toutes de son fié et les li delivre et l'en envest et met en corporel possession En tesmoignaige de laquel chose pour ce que je n'ay seal je ay proié et requis à honorable home et discret Willaume dyens de Lons que il seloit de son seal ces presentes lettres Ce fut fait en l'an de grace mil doux cenz et septante et cinc en la voille de l'assumption Nostre Dame