Charter Document - 02220475

Je Jehans de Claron chevaliers fais savoir à touz ces qui verront ces lettres que je recognois que je doy à noble donzeal Jehan de Chalon signour d'Allay mon seignour sexante livres d'estevenens bons et loious lesquies je ay eu et receu de luy de bon emprompt et loiaul en bons deniers nombrez desquex je me tien por bien paiez pour lesquies sexante livres je enloi et oblige par nom de gagiere en la main doudit Jehan mon seignour toutes les choses ci dessoz escriptes c'est à savoir le mès Perrette de Rurey le mès à fiz Florier qui part à celuy mès le mès à Mareschaut le mès à Porteterre le mès Ogier le mès Vuillemet le mès à Veitre la moitié d'un bichot de froment de champ d'aot l'uyme partie de la fromagerie des fruittures et des corvées des cherrues et quanque je ay puis avoir et doy en la vile de Deserviler ou terretoire et ou finaige en homes en maison en chasax en curtiz en cense en signorie en bois en prey en champs en pasquiers en communes et en toutes autres choses quies qu'elles soient et trente quatre septures de prey ou finaige de Levier qui sunt de ma demeneure et quarante quatre jornax de terre arable en cel meisme finaige et quanque je ay puis avoir et doy en toute ladite vile de Livier et ou terretoire en homes en maisons en chasaux en cortiz en cens en corvées en fromagerie en fructures en bois en prey en champs en pasquiers en communes en signorie et en toutes autres choses quel qu'elles soient et pour quelque raison je les i aie et tel droit et tel raison come j'ay ne puis avoir en la forest de Sarray Et toutes les choses dessusdites je dis et recognois estre dou fey adit Jehan mon seignour En tesmoignaige de laquel chose je ay requis et fait metre en ces lettres le seal dou chapitre de l'iglise de Saint Anathoile de Salins Ce fut fait l'an de l'incarnation Nostre Signour qui corroit par mil CC et quatre vinz ou mois d'aost