Charter Document - 02220472

Je Richars de Mungnet vicons de Salins faiz savoir à touz ces qui verront ces lettres que je par le loux et par la volunté de mons Symon de Mungnet chevaliers mon nevour enloie baille et met en gaige à noble dame Lore fame çay en arriers le noble baron Jehan conte de Bourgoigne et signour de Salins le fié d'Andelot que Wachiers sires d'Andelot tient de moy pour sexante livres de viennois bons et loiaux lesquex j'ay receu à empront de ladite Lore en bons deniers nombré en tel maniere que sitost come je paieroie lesdites sexante livres à ladite Lore ou à son comandement que lidiz fié d'Andelot revandroit à moy se je à ma vie ne le raimboie et se lidiz Symons mes nies le voloit raimbre après mon decès que lidiz fiez revenit à luy franchement et quittement à sitost come il aroit paiez lesdites sexante livres à ladite dame ou à son comandement En tesmoignaige de ceste chose je ay mis mon seal pendant en ces lettres Et je lidiz Symons que vuil loue et outroy et consent toutes les choses dessusdites ay mis mon seal pendant en ces lettres avez le seal le devantdit Richart mon uncle en tesmoing de verté Ce fut fait le mardi après la saint Barnabé l'apostre l'an Nostre Signour mil CC sexante et treize