Charter Document - 02220469

Je Jaquet de Cherrain damoiseal fais savoir à touz que je pour mon evidant profiet non pas contrainz ne deceu ay engagié et enloié et obligé en la main à noble baron Jehan de Chalon signour d'Allay mon amé signour par le loux et par le consentement Jehan Wachier et Estevenin mes amez freres le fié que je tien doudit Jehan mon signour c'est à savoir tout ce que je tien [à] Allay en ma demeneure et tout ce que je ay et tien à Lombart et à Requenot en champs en prey en bois en censes en homes et en toutes autres choses quel qu'elles soient à jour que ces lettres furent faites et donées pour sexante livres d'estevenens corrant à la valour de bons et metables tornois lesquies deniers je ay heu et receu doudit Jehan mon signour en bone pecune nombrée En tesmoignaige de laquel chose nous Jaquez Jehans Guachiers et Estevenin freres dessusdit avons fait seeler ces lettres des seaux à saiges persones et honestes Guillaume dien de Laon et Pierre priour de cest meisme leu lesquies nous tenons pour persones atentiques Ce fut fait et doné le sambadi devant la nativité saint Jeham Baptiste en l'an de Nostre Signour corrant par mil CC octante et un ou mois de juing