Charter Document - 02220466

Je Guillemins diz Bothoniers clerc de Besençon fais savoir à touz que come je encontre la volunté et contre l'assentement de noble baron et puissant mons Jehan de Chalon signour d'Allay viconte et maire de Besençon aie sis come juges ou siege de la maierie de Besençon en ceste presente année en usurpant en ceste maniere sadite juridicion je humilianz et desirrant cest meffait adit noble emender si com il afier ay promis à yceluy noble par mon soirement pour ce doné corporelment sus sains euvangiles le devantdit meffait par moy perpetrey et toutes autres choses que je unques dou temps passez tanque à jour de la confection de ces leitres li meffeis feit en fait ou en dit que je li emenderay et adreceray à sa volunté et marci senz nul autre maien Et pour ce faire tenir porsiegre et acomplir je ob[l]igois en la main doudit noble touz mes biens quelque part que il soient mobles et non muebles presenz et à venir et pri et requier et comant à Jehannette ma fame que ausi pour ce faire tenir et acomplir obligoit touz les suens biens en la main doudit noble Et je Jehannete fame doudit Vuillemin à la priere requeste et accion de mondit mari à toutes les choses dessusdites me suis consentie et consent et pour les choses dessusdites devoir à esmender adit noble de mondit mariz j'ay obligié et obligois en la main doudit noble [touz mes biens] de mariaige et de doaire muebles et non muebles quelx qu'il soient et promet per mon soirement que je sus les choses dessusdites esteray à la volunté doudit noble En tesmoignaige de laquel chose nous avons prié et fait metre en ces presentes lettres le seal de la court de Besençon Fait et doné le mecredi après l'uictive des Bordes l'an Nostre Signour MCCC et sept