Charter Document - 02220465

Nous Gauchiers de Commercey sires de Monrevel faisons savoir à touz que nous vuillanz et desirranz le mariaige et le doaire Merguerite de Belevevre nostre amé fame estre sauz en tel maniere que elle ne puisse estre baratée ne defraudée en acune partie avons assigné et assignons assis et assetons à ladite Merguerite nostre amée fame per le loux et per le consentement mons Gauchier nostre amez fiz chevalier pour la terre de Touthenens et de Saint Dedier et les partenances et les appendises desdites viles que elle a doné par nostre volunté à Guillermete nostre fille pour li marier et pour six cens livres de monoie corsable en Bourgoigne lesquies nos heumes et receumes de li pour son mariaige et en nom de son mariaige la moitié de nostre chestel de Monriveal et la moitié de toute la chestelenie justice et signorie qui apent et apartient adit chestel en quelque chose que ce soit en homes en mex en tailles justices corvées censes bois rivieres pescheries pasquiers costumes et autres droitures et exactions quel qu'elles soient ne coment que elles soient appelées Et volons et outroions à ladite Marguerite nostre amée fame que ladite moitié doudit chestel de Monrevel ensamble la moitié de la chestelenie des appendises et des apartenances elle puisse ordener à sa volunté et en son testament et en sa derraine volunté en tel maniere toutevoie que elle en doit doner et ordener par nostre consoil et par nostre consentement et ce que elle en feroit ensi come dessus est dit nous volons qu'il soit estable et ait vertu de chose ferme et estable Après nous avons assis et assetons à ladite Merguerite nostre amé fame pour son doaire et le don pour les noces l'autre moitié doudit chestel de Monrevel et l'autre moitié de la chestelenie et de la signorie des appendises et des apartenances qui apendent et pertiegnent adit chestel en quelque maniere que ce soit ensi come dessus est devisez Et volons et outroions que ladite Merguerite tiegne les choses dessusdites en pas et senz perturbacion de nous et de noz hoirs selon les usaiges et les costumes de Bourgoigne Et je lidiz Gauchiers chevaliers fiz doudit mons Gauchier et de ladite Merguerite ay loué et loue toutes les choses dessusdites et les ay pour bones et les conferme par tant come à moy en afier Et nous Jehans de Chalon sires d'Allay nous sumes consenti à ladite assise et assignacion et la confermons comme sires dou fey En tesmoignaige de laquel chose nous avons mis nostre seal pendant en ces lettres et avons requis nous lidiz Gauchiers sires de Monrevel et Gauchiers ses fiz nostre devantdit amé signour mons Jehan de Chalon signour d'Allay qu'il mete son seal en ces lettres Faites et données le septime jour d'avril l'an de l'incarnacion Nostre Signour corrant par MCC nonante trois