Charter Document - 02220463

Je Giles d'Aiché chevaliers juges donez de très noble baron et puissant mons Jehan de Chalon signour d'Arlay viconte et maires de Besençon es causes que y sunt meues entre ledit Jehan et touz les cithiains de Besençon sus ce que li cithiains ont mesfait envers ledit Jehan et acuns de ses genz de Besençon faisons savoir à touz ces qui verront et orront ces presentes lettres que come li cithiains de Besençon l'endemain de Quasimodo de l'an Nostre Signour corrant par MIII et six à grant multitude de genz d'armes bannieres desploiés portes fermées cloche sonée et de communal consoil et de certain propost aient abatu et destruit à force et à velunté plusours maisons en la citey de Besençon c'est à savoir les maisons Poinçart et es autres enfant à Buef de Choys la maison Estevenin Poillei et de ses comperçoniers la maison Jehan fiz Henry de Viane et la maison Henry à fiz Pierre Corne assises en la citey de Besençon et les biens meubles qui estoient deanz lesdites maisons ont pris et aforcé et lidiz malefices soient si notoires en ladite cité de Besençon que l'on ne les puet celer per acune tergiversacion mais prueve[r] que lidiz citiains sunt condampnez à refaire lesdites maisons et que lidiz malefices sunt fait premier contre Diu contre droit et droiture et en grant prejudice dou devantdiz Jehans viconte et maire de Besençon en tant que lidiz malefices ne se doivent passer senz poinne de droit ordené mais afiert que il soient pugniz en tel maniere que il soit exemple à touz temps à ces qui auroient coraige de mal faire et nous aiens fait ajorner sur ces malefices la premiere foiz perhentoirement et personelment Richart le Menoier procurour et sindique desdiz citiains Lambelin de Saint Quintin Doblier de Fromaige Renaut dou Pois Jaquin de Lantaine Othenin de Beane Perrin de Vilete Vuillemin Desus Douz Jehan fiz Navarret Girart fiz Bernardon Estiene Signoret Perrin Maier Perrin d'Aspremont Kaille l'Orfevre Guyot de Choies Mathiet Truillet Perrin Varin Hugue Crochet Girart Menegot Lambelin de Nonfoy Jehan fiz Bourget Perrin le Barbier Perrin de Dole Girart de Momboyson Vuillemin fiz Malacher Perrenet de Vaux Perrenet de Cusance Hugue de Cilz et Vuillemin de Vorges citiains de Besençon qui se dient consoilliers de la citey de Besençon qui sunt et ont estez auctours et consoillours et principaux des devantdiz malefices et qui ont excité le pueble de Besençon à faire lesdiz malefices l'uictive de la feste saint Ylaire novelement passée en la court de la vicontey de Besençon et lidiz citiains doivent baillier hostaiges soffisant en la main de très noble monseignour Hugue de Bourgoigne per covenances faites entre ledit Jehan et les citiains si come nous en sumes bien certeins pour ce que nous juges doudit Jehans et ses consoil fuissiens segurs à Besençon es jornées que nous ou ses autres juges se nous n'i estiens lour donriens et con lidiz citiains haient esté requis de bailler et doner lidiz hostaiges liquies les refusoient à baillier nous les feimes ajorner la secunde fois perhentoirement et personelment le juedi après l'uictive de Pasques après ensigant per devant nous en la court de la viconté de Besençon liquies la seconde foiz furent encors requis de baillier lesdiz hostaiges liquies la seconde foiz les ont recusez baillier et done[r] Pour quoi nous voians et consideranz que nous ne li consoil doudit Jehan ne porriens estre segur en ladite citey en façant droit et en rendant droit es causes dessusdites se lidiz hostaiges n'estoient bailliez audit mons Hugue de Bourgoigne en la forme et en la maniere que il estoit convenanciez entre ledit Jehan et les citiains de Besençon avons ajornez et fait ajorner la tierce foy perhentoirement et personelment Guyot de Choys procurour desdiz citiains en nom de procurour desdiz citiains et touz lesdiz citiains asi per devant nous en la vile de Saint Ferjuel laquele vile est en la banlieue de Besençon en la juridicion desdiz viconté et maierie de Besençon le mardi après les trois semaines de Penthecoste après ensigant à houre de tierce pour aler avant en la besoigne en tant come justice et droiture raporteroit selon les citacions qui ont esté faites à ladite jornée vile et hour Et savoir est [que] le mardi dessusdit lidiz Jehans comparisant personelment per devant nous et requerant justement que nous condampnissiens per nostre sentence diffinitive ledit procurour en nom des citiains et lesdiz citiains et lesdit Lambelin de Saint Quintin Doublier de Fromaige et les autres dessus nommez en la poinne et en l'emende que il doivent sustenir et suffrir selon droit et selon justice ledit procureour et lesdiz citiains et lesdiz Lambelin de Saint Quientin Doublier de Fromaige et les autres dessus nommez ne comparissant ne autres pour lour à ladite vile houre et jornée ledit Jehan de Chalon atendant tant come il dut personelment nous nostre diffinitive sentence droiture et equitta ce requerant disons et pronunçons en ceste maniere En non dou Pere et dou Fil et dou saint Esperit amen Per le consoil de proudomes et de saiges de droit aianz Deu devant les eaux l'absence desdiz citiains raemplie per la presence de Deu condampnons et per nostre sentence diffinitive por raisons des malefices dessusdit Guiot de Chois procurour et sindique desdiz citiains en non de procurour desdiz citiains et lesdiz citiains en la persone doudit Guiot procurour et sindique en vint mille livres de bons estevenens à paier et à rendre adit Jehan de Chalon viconte et maire de Besençon et lesdiz Guyot de Chois en lour persones Lambelin de Saint Quintin Doblier de Fromaige Renaut dou Pois Jaquin de Lantoine Othenin de Beane Vuillemin Desus Douz Girart fiz Bernardon Estene Signoret Perrin Mayer Perrin Vuarin Hugue Crochet Girart Menegot Lambelin de Nonfoy Jehan fiz Bourget Perrin Barbier Girart de Monboison Vuillemin fiz Malecher Perrenet de Waux Perrenet de Cusance et Guillemin de Vorges comme nommés devant qui sunt et ont estez auctours et principaux desdiz malefices et ont exciptey le pueble de Besençon à faire les malefices dessusdit lesquies choses sunt si notoires en la citey de Besençon que elles ne puent estre celées per acune tergiversacion bannissons de tout l'arceveschiez de Besençon tanque à rapeal de Jehan de Chalon et à ce condampnons les dessusdit per nostre sentence diffinitive et en la amission de touz lour biens lesquies nous applicons et doivent estre appliqué adit Jehan per nostredite sentence save la taxacion des despens faiz por raison desdiz malefices la taxacion desquies nous retenons à nous esques despens nous condampnons touz les citiains de Besençon pour raison des malefices dessusdit En tesmoignaige des choses dessusdites nous avons mis nostre seal en ces presentes lettres ensamble le seignel de maistre Pierre de Montbeliart publique notaire Ce fut fait en l'an Nostre Signour corrant per mil CCC et sept le mardi après les trois semaines de Penthecoste Je Pierre diz Jeunes de Montbeliart en la dyocese de Besençon publique notaires de l'auctorité le paupe de l'emperaour et dou prefet de Rome qui presenz fut à toutes les choses dessusdite à l'an à jour et à l'oure dessusdiz presenz les tesmoings cy après escript c'est à savoir Raymon abbé de Mostier Saint Jehan Guillaume abbé dou Mont Sainte Marie mons Rout signour de Nuefchesteal mons Pierre signour de Belmont mons Pierre signour d'Estavayé mons Guillaume signour de Pemes mons Jehan signour d'Estrabone mons Jehan signour de Monz mons Henry signour d'Usyes mons Wachier signour de Chestelvilain chevaliers et plusours autres dignes de foy tesmoins à ce apelez et requis cest presenz instrumenz ai soigniez de mon soignal que je ay acostumez doudit noble baron mons Jehan de Chalon proiez et requis