Charter Document - 02220462

Nos officiax de la court de Besençon faisons savoir que par devant Guillaume de Vaux clerc juré de nostre court Richars li fiz Perret de Nan Jehannin de Erceures Perres li fiz Lambelin de Su Robelet Buillez Paris Grillons Lambars diz Corbes ont confessé en droit par devant ledit nostre comandement que il sunt et doivent estre homes noble baron et saige Jehan de Chalon signour d'Allay demorant et residant à Saint Agne et ont promis lidiz homes adit Jehan par lour foy donées en la main doudit nostre comandement que il ne partiront ne lour chesel ne lour biens ne alienerunt de la vile de Saint Agne ne dou chestel ne de l'omaige adit Jehan se par la volunté adit Jehan n'estoit mais adit leuz feront residence ensi com li autres homes de Saint Agne et les rentes et toutes les autres choses que li autres homes de Saint Agne paient et rendent paieront adit Jehan et rendront ensi come il est acostumez en ladite vile de Saint Agne permaignaiblement Et pour ces choses dessusdites ont obligez et obligent en la main doudit Jehan per devant ledit nostre commandement lour et lour hoirs et touz lour biens muebles et non muebles presenz et à venir en quelque leu que il soient trovez Et ont volu et outroiez lidiz homes que se il ou li uns de lour se partoient de l'omaige adit Jehan que lidiz Jehans puisse panre lour biens et faire sa volunté où que il allent En tesmoignaige desquex choses à la relacion doudit nostre comandement avons mis le seal de la cour de Besençon en ces presentes lettres que furent faites le juedi devant la saint Andrey l'an Notre Signour corrant mil CC quatre vingz et douze