Charter Document - 02220461

Je Guillaumes de Bannens chevaliers fiz çay en arriers mons Estene le Ros de cel meisme leu faiz savoir à touz que come très noble bers mes très chiers sires messires Jehan de Chalon sires d'Allay m'ait doné dix livres de rente moy et à mes hoirs permaignablement à reçoivre en sa rente dou pois de Salins le jour de l'assumption Nostre Dame ou mois d'aost et m'ait doné un cheval ou pris de quarante livres de tornois lequel j'ay receu de luy je ces choses ay receu doudit mon très chier seignour en la forme et en la maniere ci dessos escripte c'est à savoir que je et muy hoirs devons tenir ledit cheval et harnois pour servir ledit nostre chier signour quan mestier en aura contre toutes genz et ses hoirs et lesdites dix livres de tornois de rente j'ay pour tenir ledit cheval et les harnois et pour acheter mes robes pour moy vestir Et ce estoit que lidiz chevax fut perduz ou servise mondit seignour ou de ses hoirs il le me doit rendre ou à mes hoirs tanque à la valour desdites quarante livres Et ay repris doudit mons Jehan cenz soudées de terre assises en la vile et ou terretoire de Bannens c'est à savoir Amadry Barbin et les doues parties des Sanes et les chasax de Bannens qui sont de part mon pere [l]esquelles cenz soudées de terre avez les dix livres dessusdites lidiz messires Jehan et sui hoirs puent assigner panre et tenir se ce estoit laquel chose ne soit [que] j'ay deffaillissent à tenir ledit cheval et ledit hernois Et quan aucuns hoirs vindroit qui porroit ledit cheval et ledit hernois tenir en piez pour faire le servise lidiz messires Jehans li doit rendre lesdites cenz soudées de terre et les dix livres de rente ensi come il est dessus devisez En tesmoignaige de ce j'ay requis le chapitre de Saint Anathoile de Salins qu'il metent lour seaux en ces presentes lettres Faites et donées l'an Nostre Signour corrant par mil CC octante et nuef ou mois de decembre