Charter Document - 02220459

Je Haimes prestre mareglier de l'iglise de Saint Anathoile de Salins fais savoir à touz que je dou loux et dou consentement de Estevenin le Chaigne mom amé frere ay vendu baillié et delivré perpetuelment à noble baron mons Jehan de Chalon signour d'Allay et es suens et cui il les outroira six souz censal loux loy et signorie portant lesques je avoie chescun anz sus les chesaulx qui sunt Jehan Loite assis à Salins ou borc communal devant la saule pour le pris de dix livres de monoie corsauble lesques je ay eu et receu de luy en bons deniers nombrez et m'en tien pour bien paiez En tesmoignaige de laquel chose nous li devantdiz Haymes et Estevenins freres requis avons et fait metre par Vuillemin Verguet clerc de Salins jurez de la court de Besençon en ces presentes lettres le seal de ladite court de Besençon Ce fut fait et doné l'an Nostre Signour corrant par mil CCC et seix le vintressieme jour dou mois de may