Charter Document - 02220457

Universis presentes litteras inspecturis Vitalis Dei et apostolice sedis gracia archiepiscopus Bisuntinus salutem in Domino perpetuam et felicem Ex insinuacione nobilis et potentis viri domini Johannis de Cabilone domini de Allato et de Neelle necnon et illorum qui ejus nomine in terra sua juridicionem exercent fama publica deferente nostris auribus est delatum quod aliqui nostre dyocesis se habitu fungentes clericos nichil vero de proprietate veri nominis clerici retinentes Dei timore postposito et hominum verecundia retrojecta ita sevis et enormibus actibus se immiscent quod vias publicas cum armis et sive de nocte et de die bona aliena rapere homines percutere et cum armis publice incedere non formidant que quod sint in quocumque laico repreensione digna et maximis penis punienda non solum jura testantur verum eciam in locis ubi servatur justicia facti experiencia manifestat verum cum ad publicam utilitatem pertineat quod crimina puniantur et quod ex nostra negligencia qui nequam sunt saltem deteriores non fiant sed potius corrigantur ne sanguis talium in fine judicii de nostris manibus requiratur et ad nostrum officium pertineat vicia ex quibus dampna proveniunt et decus et status Ecclesie sancte dolum patiuntur quantum nobis est possibile per nos vel alios nostri nomine corrigere ac etiam refrenare ita quod boni inter malos possint tranquillitate ac pace gaudere idcirco de fidelitate et discrecione prefati domini Johannis plenarie confidentes qui semper ad honorem Ecclesie suum animum applicavit tanquam ille qui est accensus zelo fidei ortodoxe maxime cum per nos sine ipso in presenti non possit remedium salubre adhiberi eidem tenore presencium duximus indulgendum et specialem licenciam concedendum quod ipse per se vel per alios quos ad hoc duxerit deputandos possit absque excommunicacionis nota clericos taliter [] premitittur incedentes ac eciam facientes ut melius fieri poterit sine corporum violencia capere vel capi facere et eos carceri nostri nomine mancipare ac etiam detinere ita quod de ipsis querelantibus possimus facere justicie complementum et alii timore justicie perterriti similia facere non attendant Datum die sabbati in octabis purificacionis beate Marie anno Domini MCCC tercio decimo