Charter Document - 02220454
| Charter Number: | 02220454 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Quittance |
| Date: | 1299 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 22 - Tome 2 (p.70) |
Charter:
Je Hugonins fiz çay en arriers Estevenin dit Loule d'Ornens fais savoir à touz par cex lettres que je non mie deceuz non contraint mais de ma bone volunté et pour mon evidant profiz ay vendu quitté et outroié permaignablement à touzjours pour moy et pour mes hoirs à reverenz pere en Nostre Signour Hugue par la grace de Deu evesque dou Liege et à ses hoirs la tierce partie d'un molin et d'un miche assis dessous Sailenbierge entre Bannens et La Reviere liquies molins doit chescun anz censament à devantdiz mons Hugue six emines de blef de molin pour douze livres de menoie coursable laquel some d'argent je ay eue et receue doudit mons Hugue par maistre Renaut son comandement en pecune nombrée et m'en tien pour bien paiez envestant En tesmoignaige de laquel chose je ay requis et fait seeler ces lettres des seaux de religiouses persones et honestes dan Jaque abbé dou Mont Sainte Marie et mons Haymon priour de Romain Mostier Ce fut fait l'an Nostre Signour corrant par MCC nonante et neuf ou mois de junet