Charter Document - 02220448
| Charter Number: | 02220448 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Purchase |
| Date: | 1306 |
| Date type: | Internal |
| Resource Link(s): |
Patrimoine numérisé de Besançon - MS Droz 22 - Tome 2 (p.49) |
Charter:
Nous Hugues diz de Citiaux chevaliers et Jehannins dit Loite clerc de Salins faisons savoir à touz que nous avons vendu baillié et delivré perpetuelment à mons Renaut de Noseroy chevaliers en nom et pour noble baron et puissant monseignour Jehan de Chalon signour d'Allay et pour ses hoirs trois solz censauls loy et loux et signorie portant lesques nous avons chescun anz sus le chasal Mayset assis à Salins ou bourc communal selon la saule doudit mons Jehan pour le pris de sexante et dix souz de monoie corsauble lesques nous avons eu et receu doudit mons Jehan en bons deniers nombrez desquex nous nos tegnons pour bien paiez desques trois souz censauls dessusdit venduz à touzjours mais nous nos devestons et ledit mons Jehan achetour et les suens en envestons et metons en possession corporel ou auxi per ces lettres En tesmoignaige de laquel chose nous li devantdiz Hugues chevaliers et Jehans clerc vendours requis avons et fait metre par Guillemin Verguet clerc de Salins jurez de la court de Besençon en ces presentes lettres le seal de ladite court de Besençon Ce fut fait et doné l'an mil CCC et six le vinteroisieme jours dou mois de may