Charter Document - 02220447

Nous Othes cuens palatins de Burgoigne et signour de Salins faisons savoir à touz ces qui verront ces presentes lettres que come nous eussons ajorné par devant nous à Dole le vanredi devant la nativité Nostre Signour nostre amé uncle et feal mons Jehan de Chalon signour d'Allay à prover que la garde de Balerne estoit sue aquel jour dou vanredi nous ne peumes estre mais y envoiames nostre amé feal Thiebaut signour de Rougemont en leu de nous par devant cui lidiz nostre amez oncles Jehans de Chalon signour d'Allay a fait sa prueve en la maniere ci dessouz escrite L'an mil CC octante et sept le vanredi devant la nativité Nostre Signour vient messire Jehans de Chalon par devant nous Thiebaut signour de Rougemont tegnant le leu monsignour le conte de Bourgoigne à Dole et proposa que messires Vuillaumes sires de Mungnet à tenps qu'il estoit sasi et vesti dou chestel de Mungnet et de la garde de l'abbaie de Balerne lidiz messires Vuillaume dona bailla et delivra la devantdite garde de Balerne adit messire Jehan de Chalon signour d'Allay et à ce prover come il est dessus dit amena tesmoing par devant nous adit vanredi ci dessouz escrit Li tesmoings dirent par lour soirement en adience senz autre examinacion que ce que lidiz messires Jehans avoit proposé estoit voirs ansi come il est dessus dit Et nous sires de Rougemont dessusdit receumes les soirement desdiz tesmoins dessouz escript pour tant come il devroient valoir selon le usaige de l'ostel mons le conte sauves les raisons de chescuns Et protesta per devant nous lidiz messires Jehans de Chalon que se ladicte prueve ne valoit que il la feit en leu et en temps à la volunté mons le conte Li nons des tesmoins sunt telx mons Pierre dou Pasquier chevaliers mons Jehans de Chaffoy mons Richart de Vy chevaliers frere Hombert priour dou Mirour frere Jaiques moines de Balerne Estenes de Noseroy donzeal Ou tesmoing de laquel chose nous li devantdiz Othes cuens de Bourgoigne et signour de Salins avons fait metre nostre seal en ces presentes lettres faites et donées l'an mil doux cenz octante et sept le sambadi devant la nativité Nostre Signour