Charter Document - 02220445

Nous Forquenins Jehans et Estevenins freres enfanz çay en arriers Hugonet fiz Danviot chestelain de Bracon faisons savoir à touz que nous non mie contraint de nostre bone volunté pour noz propres besoignes despagier avons vendu quitté et outroiez permaignablement à noble baron Jehan conte de Bourgoigne et signour de Salins le vergier que nous aviens à Salins assis d'une part entre la maison qui fut Estiene le Fevre pour estre apendant à ladite maison et à la salnerie d'autre part saus dix et huit deniers censaus que parties doudit vergier doivent c'est à savoir mons Hugon le Gros trois deniers mons Richart de Myon six deniers mons Renaut Ferrier trois deniers mons Perron le Gros trois deniers et mons Oudon d'Esterno trois deniers pour cenz livres d'estevenens que nous avons receu doudit conte en bone pecune nombrée tornée en nostre profit et desquex nous nos tenons pour bien paiez Et pour ce que ce soit ferme chose et estauble nous avons prié et requis à chapitre de Saint Michiel et de Saint Anathoile de Salins que lours seaux meissent en cestes lettres Ce fut fait ou mois d'aost l'an Nostre Signour qui corroit par mil doux cenz et sexante et six