Charter Document - 02220441

Je Guillemins escuiers fiz mons Hugon dit de Layer chevaliers de Salins chastelain de Chestelbelin fais savoir à touz que je non mie deceu ne contrainz ne par force ne par barat ne par paour ne par prieres menez mais de ma bone volunté ay doné done baille delivre quitte et outroie permaignablement et sans rapeal en eschange et en permutacion à noble baron mons Jehan de Chalon signour d'Arlay et es suens quatre pieces de terre assises ou terretoire de Gerraise desquex quatre pieces de terre li une siet devant l'abergement adit mons Jehan liquel piece de terre est apelée li champ de Boiz item li autre piece de terre siet selon la terre es hoirs mons Pierre dit Esperit chevalier qui fut monseignour Guillame Alarate chenoine de Saint Michiel de Salins item li autre piece de terre siet desoz Pralon selon la terre mons Jehan Ferrer chevalier de Salins et li autre piece siet selon le prey Hugon de Poupet qui soloit estre chestelin de Saint Aigne franches et quittes de touz cens et de toutes costumes et de tous servitus Et ceste chose j'ay doné en nom d'eschainge adit mons Jehan por une soue piece de bois ensamble le trasfons qui siet oudit terretoire de Jerraise selon mon bois et dure de lonc dois le fol de Val qui part mon bois et le bois es hoirs Jehan de Boiz et à lour partaiges tanque sus la coste de Val et dois le morgier de prey Sambrus trait ladite piece de bois tanque à Rochaz dessus le biez de la Cuse et dois ledit morgier par ansi come la cherriere s'en va à bois de Val trait tanque adit bois de Val franche et delivre de touz cens et de toutes costumes et de tous servituz En tesmoignaige de laquel chose je li devantdiz Guillemins escuiers ay requis et fait mettre en ces presentes lettres le seal dou chapitre de Saint Anathoile de Salins Ce fut fait et doné en l'an de la grace Nostre Signour corrant par mil CC quatre vingt et huit ou mois de joing