Charter Document - 02220438

Je Perrins de Mellanz fiz mons Huidon de Mellant fais savoir à ces qui verront ces lettres que pour moy et pour mes freres desquies je suis avoiez et pour lesquelx je enloi moy et mes biens de porter garandie pour moy et pour aux de ce que je fais la siexte partie que je et muidiz freres avons de partaige en la terre qui est appelée la terre et li prel de Mellant assise entre Monmaour et Desserviler environ les Embotours et la sixte partie dou siege dou molin que je et muidiz freres avions et davions avoir esdiz Embotours et ce que je et muydiz freres havions et devions avoir par raison doudit partaige et en autre meniere dois Monmaour tanque à Deserviler en prey en bois en terre arable en siege de molin en diemes et en autres choses ay vendu pour moy et pour mes freres à noble baron Jehan conte de Bourgoigne et signour de Salins pour ouit livres et dix souz d'estevenens lesquiex je ay receu de luy en pecune nombrée tornée en mon profit et ou profit de mesdiz freres et desquies je me tien plenierement pour paiez recognoissant en ma loialté que lesdites choses vendues ne tegniens de fié je ne muidiz freres ne à cens de home nez et les promet garantir pour moy et pour mes freres adit conte loiament et à bone foy et se acuns se trahoit avant que riens chalongaist esdites choses pour fié ou pour cens et garantir ne le puisse rasonablement pour ce que ataint en seroit enli pour moi et pour mesdiz freres en la main doudit conte ce que je et muydiz freres avons à Mellant Et en tesmoignaige de ce à la priere et à la requeste doudit Perrin li chapistre de Saint Michiel et de Saint Morix de Salins ont mis lour seaux pendant en ces lettres Ce fut fait ou mois de novembre l'an Nostre Signour qui coroit par mil II cinquante et nuef