Charter Document - 02220437

Je Perrins sire de Val Mercuil fais savoir à touz que je de ma bone volunté non mie contraint pour mes propres besoignes que eschiver ne pooie despagier ay vendu et quitté à noble baron Jehan conte de Bourgoigne et signour de Salins mon signour Joigne et le puy dessus Joigne et toutes les appendises de Joigne et quanque je y hay en bois en pré en chans en riviere en piaige c'est à savoir le tier dou piaige en signorie en justice en fyé et en toutes autres choses lesquex choses devantdites je tenoie en fié lige doudit conte pour quatre cenz et cinquante livres d'estevenens que je ay eu et receu doudit conte en bone pecune nombrée tornée en mon profit et desquiex je me tien pour bien paié En tesmoignaige de laquel chose li religious home et honeste li abbes de La Charité li abbes de Monbenoit et li abbes dou Mont Sainte Marie ont mis lour seaux pendant en ces presentes lettres à ma priere et à ma requeste ensamble le mien seal Ce fut fait et doné le vanredi devant la feste saint Jorge l'an de l'incarnacion Nostre Signour qui corroit par mil CC sexante et six