Charter Document - 02220433

Sachent tuit cil qui verront ces lettres que con discors fut entre le noble baron Jehan conte de Bourgoigne et signour de Salins d'une part et dame Clemence fame çay en arriers mons Odon de Layer de Salins pour li et pour ses enfant que doudit Odon li sunt demoré d'autre part de un giste que lidiz cuens demandoit chescun an sur les homes de Dampierre en la cha d'Allié que ladite dame et suy enfant y tenoient de par ledit Odon hoir çay en arriers mons Pierre de Layer tex accors est venuz entre les parties c'est à savoir que ladite dame pour li et pour sesdiz enfant non mie contrainte mais de sa bone volunté a voluz consentir et outroié et assis adit conte et à ses hoirs pour ledit giste trente souz d'estevenens permaignablement chescun an à paier adit conte et à ses hoirs ou à lour commandement à feste saint Estiene de moisons Et lidiz cuens pour luy et pour ses hoirs a quité à ladite dame et à sesdiz enfant ledit giste permaignablement pour lesdiz trente soulz Et ont promis l'une partie et li autre ledit acort tenir loialment et à bone foy et que encontre ne vanront ne soffreront que autres y viegne à lour pooir En tesmoignaige de ceste chose nous li abbes de Rosyeres et nous Guillames dyens de Laons à la priere de l'une partie et de l'autre avons mis noz seaux pendant en ces lettres Ce fut fait le jour de l'envention de la Croyz l'an Nostre Signour qui corroit par mil CC et quarente et cinc