Charter Document - 02220432
| Charter Number: | 02220432 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1296 |
| Date type: | Internal, Calendar, Papal |
| Resource Link(s): |
Patrimoine numérisé de Besançon - MS Droz 22 - Tome 2 (p8) |
Charter:
Bonifacius episcopus servus servorum Dei dilecto filio nobili viro Johanni de Cabilone domino de Allato salutem et apostolicam benedictionem Grata tue devocionis merita quibus Romanam honoras et veneraris Ecclesiam promerentur ut personam tuam dignis favoribus et honoribus congruis accolamus Sane petitio tua nobis exhibita continebat quod clare memorie Rodulphus Romanorum rex ad honores tuos et profectus intendens licenciam cudendi monetam in terra tua ad valorem denariorum parisiensium vel minoris valoris in denariis vel obolis prout velles et crederes expedire tibi et heredibus tuis in perpetuum de consensu principum mera liberalitate concessit prout in patentibus litteris super hoc confectis eorundem regis et principum sigillis munitis plenius asseritur contineri Nos itaque tuis supplicationibus gratiosius inclinati quod super hoc ab eodem rege proinde factum est ratum habentes et gratum id auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere vel ei ausu temerario contraire Si quis autem hoc attemptare presumpxerit indignationem omnipotentis Dei et beatorum Petri et Pauli apostolorum ejus se noverit incursurum Datum Rome apud Sanctum Petrum V nonas marcii pontificatus nostri anno secundo