Charter Document - 02220429

Je Hugonins escuiers fiz çai en arriers mons Perron de Nan chevaliers fais savoir à touz que je non mie deceu ne contrainz ne par force ne par barat ne par paour ne par proieres menez mais de ma bone volunté et pour mes besoignes à faire profitablement et pour mes debtes paier ay venduz vende baille quitte et outroie permaignablement et senz rapeler à noble baron mons Jehan de Chalon signour d'Allay et es suens et cui il l'outroieroit toute la terre arable et non arable que je ay puis ne doy avoir ou terretoire de Montagiez et quanque my homes ont puent ne doivent avoir oudit terretoire de terre assiment en laquele terre il a douze jornaux de terre et plus lesquiex choses sunt dou fié doudit mons Jehan et les tenoie de luy de fié ligement Et cestes choses je ay vendu pour vint livres d'estevenens bons et depensables lesquies j'ay eues et receues doudit noble baron à temps de ceste vendicion en bons deniers nombrez et de ce je me tieng pour bien paiez En tesmoignaige de laquel chose je li devantdiz Huguenins escuiers ay requis et fait metre en cestes lettres presentes le seal dou chapitre de Saint Anathoile de Salins Ce fut fait et doné en l'an de grace Nostre Signour corrant par MCC quatre vint et nuef le juedi devant les Bordes ou mois de fevrier