Charter Document - 02220428

Je Jehannete jadis fille mons Richart d'Abbens fais savoir à touz que je non mie deceue ne baratée mais de ma bone volunté ay outroié à mon amé signour mons Jehan de Chalon signour d'Allay et à ce me suis consentie et consente expressement que il en toutes les manieres que il miex porra et verra que ses profit sera conquiere et aquiere de Jehannete jadis fame à Guillemin signour d'Abbens mon frere toutes les choses qu'ele tient des biens doudit Guillemin mon frere qui ses mariz fut quel qu'eles sont pour raison de doaile ou de don pour les noces en prey en bois en champs en chesaux en mex en homes en tailles en prises en signories [en] costumes en fié en rierefié aigues cours d'aigues pescheries et autres choses quel qu'eles soient ne coment que eles sunt apelées Et tel conquest com il fera desdites choses et sus lesdites choses en tout ou en partie je loue et outroie adit mons Jehan pour luy et pour ses hoirs en tel meniere que je ne mi hoirs ne poons reclamer aquest ne conquest que il eut fait desdites choses en tout ne en partie pour raison d'eschoite ou de parenté selon les usaiges de Bourgoigne sauz ce que se ladite Jehannete moroit ançois que je morisse je doy avoir et percevoir les fruit et les yssues de tel partaige con je doy avoir es choses que ladite Jehannete tient pour raison de son douaile à ma vie tant seulement et après mon decex doit tout demorer quittement adit mons Jehan et à ses hoirs se tant n'estoit que je heusse loiaux hoirs de mon cors esquies mesdiz partaiges doit demorer tout quittement senz riens paier adit monsignour de ce qu'il auroit mis en aquerir ledit douaile de ladite Jehannete En tesmoignaige de laquel chose j'ay requis et fait metre en ces lettres les seaux des honorables chapitres de Saint Anathoile et de Saint Michiel de Salins Faites et donées ou mois de decembre l'an mil CC et nonante