Charter Document - 02220427

Je Jehannete jadis fille mons Richart signour d'Abbens fais savoir à touz que je non mie deceue ne baratée ne contrainte ne à ce menée par force ne par barat mais de ma bone volunté regardanz les grant biens que li nobles bers mes amez sires messires Jehan de Chalon sires d'Arlay m'a fait et especialment regardant à ce que il m'a doné cenz livres d'estevenens desquies je me tien pour bien paié willanz recompenser à luy en ce que je puis les bienfait et les cenz livres dessusdites ay doné done et outroie baille et delivre adit mons Jehan pour luy et pour ses hoirs en nom de donacion pure et parfaite faite entre les viz senz rapeler à touzjours mais toutes les choses quereles reclains et actions que j'ay puis et doy avoir ou porroy ou devroy avoir en l'en avant en quelque maniere et pour quelque raison que ce soit ou pour raison d'eritaige ou de nostre partaige ou de mariaige ou d'eschoite et en autre meniere ou chestel et ou bourc d'Abbens en tout le terretoire ne es apartenances et es appendises et en toute la chestelenie doudit leu et generament et especialment tout quanque je ay puis et doy avoir entre la reviere dou Dou et la reviere de Loue et esdites rivieres en quelque maniere que ce soit ne quelque choses que ce soient en prey en bois en champs en chesaux en meix en homes en tailles en prises en corvées en justices en signories en costumes en fey en rierefié pasquiers aigues cours d'aigues pescheries et autres choses quel que eles soient ne coment qu'elles soient appelées outroiant à luy toutes actions reaux ou personex directes et profitables que j'ay puis et doy avoir porroy ou devroy avoir esdites choses En tesmoignaige de laquel chose j'ai requis et fait metre en ces presentes lettres les seaux des honerables chapitres de Saint Anathoile et de Saint Michiel de Salins Faites et donées ou mois de decembre l'an de l'incarnacion Nostre Signour corrant par mil CC et nonante